अनुसूचित जातींसाठी प्रभाग वाढवा

अनुसूचित जातींसाठी प्रभाग वाढवा
माजी मंत्री विजयभाई गिरकर यांची मागणी
कांदिवली, ता. ३ (बातमीदार) ः मुंबई महापालिकेपेक्षा छोट्या महापालिकांमध्ये अनुसूचित जातीच्या प्रभागांचे आरक्षणाचे प्रमाण अधिक आहे. मुंबई महापालिकेत अनुसूचित जातींसाठी फक्त १३ प्रभाग (वाॅर्ड) आहेत. समता परिषद मुंबईच्या वतीने माजी मंत्री विजयभाई गिरकर यांनी आपल्या शिष्टमंडळासह महाराष्ट्र राज्य अनुसूचित जाती/जमाती आयोगाचे उपाध्यक्ष ॲड. धम्मपाल मेश्राम यांना लेखी निवेदन दिले आहे.
ॲड. मेश्राम यांनी संबंधित खात्याच्या अधिकाऱ्यांसह संयुक्त बैठक घेऊन तफावत दूर करण्यासाठी योग्य निर्णय घेऊ, असे आश्वासन दिले. महाराष्ट्रातील प्रमुख महापालिकांतील एकूण प्रभाग संख्या व यामधील अनुसूचित जातींसाठी आरक्षित प्रभागांची रचना पाहता मुंबईत हे प्रमाण कमी असल्‍याचे निवेदनात म्‍हटले आहे.
मुंबई महापालिकेत एकूण २२७ प्रभाग असून, अनुसूचित जातींसाठी फक्त १३ प्रभाग आहेत. नाशिक महापालिकेत १२२ प्रभाग असून, अनुसूचित जातींसाठी १८ प्रभाग, छत्रपती संभाजीनगर महापालिकेत, ११३ प्रभाग असून, अनुसूचित जातींसाठी २२ प्रभाग, नागपूर महापालिककेत १५१ प्रभाग असून, अनुसूचित जातींसाठी २४ प्रभाग, पुणे महापालिकेत १६२ प्रभाग असून, अनुसूचित जातींसाठी १९ प्रभाग आहेत. ही तफावत पाहता आगामी महापालिकेच्या निवडणुकीत अनुसूचित जातींवर अन्याय होऊ नये, यासाठी भाई गिरकर यांनी पुढाकार घेतला आहे. मेश्राम यांनी १० जूनला संयुक्त बैठक घेऊन योग्य निर्णय घेण्याचे आश्वासन दिले आहे. या वेळी माजी नगरसेविका समिता कांबळे, ॲड. संदीप जाधव, योजना ठोकळे, विनोद कांबळे, विजय पवार उपस्थित होते.