म्हाडाच्या जगेवरील होर्डिंगचे स्ट्रक्चरल ऑडिट करणे बंधनकारक

म्हाडाच्या जागेवरील होर्डिंगचे स्ट्रक्चरल ऑडिट करणे बंधनकारक
संबंधितांना नोटीस देण्यास सुरुवात
सकाळ वृत्तसेवा
मुंबई, ता. ५ : म्हाडाच्या जमिनीवरील बेकायदेशीर होर्डिंग आता रडारवर आले आहेत. पावसाळ्यादरम्यान होर्डिंग कोसळून अपघात घडू नये, यासाठी म्हाडाने आपल्या जागेवरील होर्डिंगला नोटीस पाठवण्यास सुरुवात केली आहे. संबंधित होर्डिंगधारकांना स्ट्रक्चरल ऑडिट करण्याचे निर्देश दिले आहेत. तसेच एखाद्या होर्डिंगधारकाने स्ट्रक्चरल ऑडिट न केल्यास कारवाई केली जाईल, असेही म्हाडाने स्पष्ट केले आहे.
मुंबई शहर आणि उपनगरांत म्हाडाच्या जागेवर सुमारे ५८ होर्डिंग आहेत. त्यापैकी केवळ दोन अधिकृत असून, उर्वरित होर्डिंग अनधिकृत आहेत. त्यांना अधिकृत करण्याबरोबरच मागील प्रभावाने त्यांच्याकडून भाडे वसूल करण्यासाठी म्हाडाने होर्डिंग पाॅलिसी आणली आहे. त्याअंतर्गत संबंधितांनी आवश्यक कागदपत्रांची पूर्तता करून होर्डिंग अधिकृत करणे आवश्यक आहे. दरम्यान, तत्पूर्वी होर्डिंग कोसळून अपघात घडू नये, यासाठी म्हाडाने संबंधितांना नोटीस पाठवत होर्डिंगचे स्ट्रक्चरल ऑडिट करून अहवाल सादर करण्यास सांगितले आहे.
टाळाटाळ करणाऱ्यांवर कारवाई केली जाईल, असेही म्हाडाच्या एका वरिष्ठ अधिकाऱ्याने सांगितले. तसेच एखाद्या कंपनीने होर्डिंगचे स्ट्रक्चर ऑडिट केले नसेल किंवा त्याला मजबुती दिली नसल्‍यास होणाऱ्या अपघाताला संबंधित होर्डिंग कंपनी जबाबदार राहणार आहे.