कल्याणमध्ये तीन हजार रोपांची लागवड

कल्याणमध्ये तीन हजार रोपांची लागवड
सकाळ वृत्तसेवा
डोंबिवली, ता. ५ : जागतिक पर्यावरणदिनानिमित्त कल्याण-डोंबिवली महापालिका, एमएमआरडीए आणि विविध सामाजिक संस्थांच्या माध्यमातून कल्याण पश्चिमेतील हंबर्डे अमृत वन या ठिकाणी विविध प्रजातीच्या तीन हजार रोपांची लागवड करण्यात आली. या वेळी पालिका आयुक्त अभिनव गोयल यांनी सांगितले की, वृक्षारोपणसाठी मोठ्या प्रमाणात जनजागृती करण्यात येणार आहे. ‘एक विद्यार्थी एक वृक्ष’ या संकल्पनेच्या माध्यमातून लोकचळवळ सुरू करण्यात येणार आहे. समाजातील प्रत्येक घटकाने या वृक्षारोपणाच्या चळवळीत सहभाग घ्यावा. कल्याण-डोंबिवली महापालिका क्षेत्रात प्रत्येक महिन्यात असे कार्यक्रम राबवण्यात येणार आहे. त्याचप्रमाणे पर्यावरण संवर्धनासाठी प्लॅस्टिकमुक्ती हे अभियान राबवण्यात येणार आहे. प्लॅस्टिकमुक्तीसाठी प्लॅस्टिकचा कमीत कमी वापर करण्यासाठी नागरिकांमध्ये विविध उपक्रमांच्या माध्यमातून जनजागृती करण्यात येणार आहे. लोकांनी प्रदूषण टाळण्यासाठी वाहनांचा कमीत कमी वापर करावा, सौरऊर्जेचा वापर करावा, विजेची बचत करावी, असे आवाहनदेखील आयुक्त गोयल यांनी केले.