अग्निशमन दलाच्या बोटीद्वारे खाडीत पाहणी

अग्निशमन दलाच्या बोटीद्वारे खाडीत पाहणी
कल्याण, ता. ५ (वार्ताहर) : महापालिका आयुक्त अभिनव गोयल यांनी बुधवारी (ता. ४) पावसाळ्याच्या पार्श्वभूमीवर अग्निशमन दलाच्या बोटीतून कल्याणच्या खाडीत पाहणी केली. पावसाळ्यात पूरस्थिती उद्भवल्यास अग्निशमन दलाच्या तयारीचा आयुक्त गोयल यांनी या वेळी आढावा घेतला.

मे महिन्यापासून कल्याण-डोंबिवली परिसरात पावसाने जोरदार हजेरी लावली आहे. काही सखल भागात पाणी साचल्याच्या घटना घडल्या आहेत. या पार्श्वभूमीवर पावसाळ्यात अतिवृष्टीमुळे पूरस्थिती उद्भवल्यास कल्याण-डोंबिवली महापालिकेच्या अग्निशमन दलाकडून कशा प्रकारे व्यवस्थापन केले जाईल, याचा लेखी अहवाल अग्निशमन दलाचे मुख्य अग्निशमन अधिकारी नामदेव चौधरी यांनी यापूर्वीच सादर केला आहे. या अहवालानुसार अग्निशमन दलाची तयारी किती आहे, याचा आयुक्त अभिनव गोयल यांनी बुधवारी प्रत्यक्षात आढावा घेतला. अग्निशमन दलाकडे असलेल्या रबरी बोटीद्वारे कशा प्रकारे बचावकार्य केले जाऊ शकते, याचीही माहिती घेतली. या वेळी शहर अभियंता अनिता परदेशी, उपआयुक्त वंदना गुळवे, मुख्य अग्निशमन अधिकारी नामदेव चौधरी, कार्यकारी अभियंता जगदीश कोरे, सहाय्यक आयुक्त धनंजय थोरात, अग्निशमन केंद्र अधिकारी विनायक लोखंडे उपस्थित होते.

गणेश घाटावर मॉक ड्रिल
पावसापूर्वी आणि पावसाच्या दरम्यान कोणतीही घटना घडू शकते, यासाठी आपली प्रतिसादाची वेळ चांगली होण्याच्या उद्देशाने ही पाहणी करण्यात आली. आपली प्रतिसादाची वेळ जितकी चांगली असेल, तितक्या लोकांचे आपण प्राण वाचवू शकतो. तसेच अग्निशमन दलाची बोट आणि इतर यंत्रणा व्यवस्थित सुरू आहेत की नाही, याचेही मॉक ड्रिल दुर्गाडी गणेश घाटावर घेतल्याची माहिती आयुक्त अभिनव गोयल यांनी या वेळी दिली