घाटकोपर येथे नालेसफाईचा दावा फोल

घाटकोपर येथे नालेसफाईचा दावा फोल
पाणी भरल्याने पालिकेच्या कामांवर प्रश्नचिन्ह
घाटकोपर, ता. ५ (बातमीदार) ः मुंबई महापालिकेकडून पावसाळ्यापूर्वी नालेसफाई पूर्ण झाल्याचा दावा केला जात आहे, तर दुसरीकडे तो किती फोल आहे, हे अनेक ठिकाणच्या कचऱ्याने भरलेल्या नाल्यामुळे समोर येत आहे. असाच प्रकार घाटकोपर पूर्वेकडील अनेक ठिकाणी दिसून येत आहे.
पंतनगरमधील नायडू कॉलनी, साईबाबा नगर भागातील मोठा नाला अद्यापही कचऱ्याने तुडुंब भरला आहे, मात्र याकडे पालिकेचे लक्ष नाही, अशा प्रतिक्रिया येथील स्थानिकांनी दिल्या आहेत. घाटकोपर, विद्याविहार आदी ठिकाणचे काही नालेही अद्याप साफ झालेले नाहीत, तर घाटकोपर पूर्वेतील नायडू कॉलनी येथील मोठा नाला तसेच इतरही गटारे कचऱ्याने वेढली आहेत. त्यातच मे महिन्यातील मुसळधार पावसाने अनेक ठिकाणी पाणी भरल्याने पालिकेच्या कामांवर प्रश्नचिन्ह उभे राहिले आहेत.
त्यानंतर पालिकेने पुन्हा गटार, नाले साफ करण्यास घेतले आहेत, मात्र घाटकोपर पूर्वेकडे पालिका अधिकाऱ्यांचे लक्ष नसल्याचे दिसून येत आहे. दरम्यान, आता पावसाळा सुरू झाला असून, या नाल्यांची सफाई कशी होणार, असा सवाल करत ही सफाई तातडीने करण्याची मागणी स्थानिकांतून केली जात आहे. याबाबत पालिकेच्या घाटकोपर एन विभागाचे सहाय्यक आयुक्त गजानन बेल्लाळे यांच्याशी संपर्क साधला असता ते उपलब्ध झाले नाहीत. त्यामुळे त्यांची प्रतिक्रिया समजू शकली नाही.

प्रतिक्रिया
पालिकेने या परिसरात अर्धवट नालेसफाई केली आहे. त्यामुळे नाल्यात साठलेल्या कचऱ्यामुळे परिसरात डासांचा प्रादुर्भाव वाढत आहे.
- सतिश पवार, सामाजिक कार्यकर्ते

नाल्याची पूर्णतः सफाई झालेली नाही. त्यामुळे दुर्गंधीदेखील खूप आहे. मच्छरदेखील वाढले आहेत. पालिकेने नाला पूर्ण साफ करावा.
- ॲड. राहुल गुप्ता, स्थानिक

नालेसफाईमध्ये प्रचंड भ्रष्टाचार झाल्याचे सकृतदर्शनी दिसून येत आहे. येत्या पावसाळ्यात मुंबईची तुंबई झाल्यास कंत्राटदार व पालिका अधिकारी यांना धडा शिकवल्याखेरीज मनसे गप्प बसणार नाही.
- अभिषेक सावंत, मनविसे सचिव

दरवर्षी पावसाळ्याआधी नालेसफाई केली गेली असे दाखवले जाते, पण प्रत्यक्षात अनेक भागांत अजिबात काम होत नाही. नायडू कॉलनीतील परिस्थिती त्याचे जिवंत उदाहरण आहे. येथील नालेसफाई करून नागरिकांना दिलासा द्यावा. संबंधित विभागाचा ऑन रेकॉर्ड अहवाल जाहीर करावा. दोषी ठेकेदारांवर कारवाई करावी.
- अनिल गलगली, माहिती अधिकार कार्यकर्ते