नवी मुंबईतील लोकहितकारी वास्‍तू कुलूपबंद

नवी मुंबईतील लोकहितकारी वास्‍तू कुलूपबंद
उद्‌घाटन होऊन लोटला वर्षाचा काळ; नागरिकांमध्ये नाराजी
तुर्भे, ता. ५ (बातमीदार) ः नवी मुंबई महापालिकेच्या वतीने, शहरातील नागरिकांसाठी विविध सोयीसुविधा पुरविण्यात येतात. यासाठी महापालिकेकडून अनेक वास्तू, इमारती उभारण्यात आलेल्या आहेत, मात्र या लोकहितकारी वास्‍तूचे लोकार्पण विविध कारणांनी रखडले आहे. त्‍यामुळे नवी मुंबईकरांकडून नाराजी व्‍यक्‍त केली जात आहे. या वास्‍तूमध्ये रात्र निवारा केंद्र, पशुवैद्यकीय रुग्णालय, व्‍यायामशाळा आदींचा समावेश आहे.
गेल्या वर्षी लोकसभा निवडणुकांची आचारसंहिता लागण्याअगोदर मुख्यमंत्र्यांना वेळ नसताना ऑनलाइन पद्धतीने यातील अनेक वास्तूंचे लोकार्पण करून घेतले, मात्र एक वर्षाचा कालावधी उलटून गेलातरी या वास्तू सर्वसामान्यांच्या वापरासाठी खुल्या झालेल्या नाहीत. त्यातील बहुतांश वास्तू आजही धूळखात पडल्या आहेत. गुढीपाडव्याच्या मुहूर्तावर घणसोली येथील रात्र निवारा केंद्र बेघरांसाठी खुले झाले. त्यानंतर वाशी सेक्‍टर-३ येथील महात्मा जोतिबा फुले स्मृतिभवन लोकार्पणानंतर नियमित सुरू आहे, मात्र इतर वास्तूंचे उद्‌घाटन होऊनही ते कुलूपबंदच आहेत. त्यामुळे या वास्तूंचा वापर सर्वसामान्यांना कधी करायला मिळणार, असा सवाल केला जात आहे. महापालिकेने उभारलेल्या वास्तूचा वापर होत नसल्याने अक्षरशः लाखो करोडो रुपयांचा चुराडा झाला आहे. याबाबत सामाजिक कार्यकर्ते नीलेश कचरे यांनी पालिकेकडे वारंवार या वास्तू खुल्या करण्याबाबत पत्रव्यवहारदेखील केला आहे. तसेच संदर्भात महापालिकेला १५ दिवसांचा अल्टिमेटम देण्यात आला असून, यानंतरही कारवाई न झाल्यास आमरण उपोषण करण्याचा इशारा देण्यात आला आहे. याबाबत कचरे यांनी पालिका आयुक्त डॉ. कैलास शिंदे यांची भेट घेतली. या समस्येला पूर्ण गांभीर्याने घेतले असून, ही समस्या नागरिकांच्या दृष्टिकोनातून अत्यंत महत्त्वपूर्ण आहे आणि येत्या काही दिवसांत या सेवासुविधा जनतेसाठी खुल्या करण्यात येतील, असा स्पष्ट विश्वास त्‍यांनी व्यक्त केला आहे.
...................
बंंद असलेल्या वास्‍तू
सानपाडा दैनंदिन बाजार संकुल
जुईनगर येथील पशुवैद्यकीय रुग्णालय
सानपाडा येथील गावदेवी व्यायामशाळा
वाशीमधील स्वामी विवेकानंद सांस्कृतिक भवन