कोकणवासियांना खुशखबर ; ठाण्यात दोन अतिरिक्त आरक्षण खिडक्या

कोकणवासीयांना खुशखबर! दोन अतिरिक्त आरक्षण खिडक्या
रांगेत उभे राहण्याची दमछाक कमी होणार
सकाळ वृत्तसेवा
ठाणे, ता. ६ : मुंबईसह ठाणे, कल्याण-डोंबिवली आदी शहरांमधून गणेशोत्सवानिमित्त कोकणात जाणाऱ्या चाकरमान्यांची संख्या अधिक आहे. त्यात सध्याच्या घडीला ठाणे रेल्वेस्थानकात असलेल्या आरक्षण तिकीट खिडक्यांच्या संख्या गर्दीच्या काळात कमी पडतात. याची दखल घेत, गणेशोत्सवानिमित्त ठाणे रेल्वेस्थानकात कोकण रेल्वेच्या तिकिटासाठी दोन अतिरिक्त आरक्षण खिडक्या सुरू होणार असल्याने गणेशभक्तांची वेळ आणि रांगेत उभे राहण्याची दमछाक कमी होणार आहे.
नोकरी आणि उद्योगधंद्यानिमित्त लाखो कोकणवासीय ठाणे, मुंबई आणि उपनगरांत स्थायिक झाले आहेत. गणपतीसाठी बहुसंख्य कोकणवासीय रेल्वेचा पर्याय निवडतात, मात्र आरक्षण खिडक्यांची नगण्य संख्या आणि लांब रांगांमुळे नागरिक मेटाकुटीला येतात. ही बाब लक्षात घेऊन कोकण रेल्वे प्रवासी संघटनेने ठाणे रेल्वेस्थानकात आरक्षण तिकीट खिडक्या वाढवण्याची मागणी गेली चार वर्षे लावून धरली होती.
खासदार नरेश म्हस्के यांच्याकडे संघटनेने मागणी केली असता त्यांनी मध्य रेल्वेकडे ७ मे रोजी यासंदर्भात पत्रव्यवहार केला. याची दखल घेत सोमवारी (ता. २) मध्य रेल्वेचे अप्पर मंडल रेल प्रबंधक तरुण कुमार यांनी पत्राद्वारे दोन अतिरिक्त आरक्षण तिकीट खिडक्या ठाणे स्थानकात सुरू केल्याची माहिती दिली. २० जून ते ५ जुलै यादरम्यान दोन अतिरिक्त आरक्षण खिडक्या सुरू राहणार आहेत. सध्या चार आरक्षण खिडक्या कार्यरत आहेत. त्यामुळे आता आरक्षण खिडक्यांची संख्या सहा होणार असल्याने कोकणवासीयांना रांगेत जास्त वेळ ताटकळत राहावे लागणार नसल्याने प्रवासी संघटनेने आनंद व्यक्त केला आहे.