घरगुती लोणच्यामुळे जेवणाला स्वाद

शहापूर, ता.७ (वार्ताहर): शेवया, कुरडया, खारुड्या तयार करण्याची लगबग असताना मेमध्ये पावसाने अचानक हजेरी लावली होती. हवामानात गारवा निर्माण झाल्याने ग्रामीण भागातील लोणच्यासाठीच्या कैरी दाखल झाल्या असून ८० ते १०० रुपये किलो दराने विक्री केली जात आहे.
शहापूर तालुक्यात वर्षभर लागणारे लोणचे घरीच तयार करण्याची परंपरा आहे. त्यामुळे बाजारातून लोणच्याचे साहित्य खरेदी करण्याला वेग आला आहे. लवंग, मिरे, बडीशोप, मोहरीची डाळ यासह प्रसिद्ध कंपन्यांच्या लोणच्याची मागणी वाढली आहे. जेवताना ताटात चवदार लोणचे हवे असते. सध्या लोणच्यासाठी लागणाऱ्या मिरची, तेल, मसाल्याचे दर थोडे वाढले आहेत. तसेच गावरान कैरी देखील ८० ते १०० रुपये किलो दराने मिळत आहे. त्याचबरोबर लंगडी, मारुती, खोबऱ्या, तोतापुरी अशा आंब्यांना देखील मागणी वाढली आहे.
--------------------------------------------
ग्रामीण भागात विशेष मागणी
ग्रामीण भागात घरगुती लोणच्याला प्राधान्य दिले जाते. रेडिमेड लोणच्याला चव नसते. त्यात सायट्रिक ॲसिड जास्त असते. त्यामुळे सूक्ष्मजंतूंपासून संरक्षण मिळते. परंतु, चव कमी होते. घरगुती लोणचे १०० टक्के शुद्ध आणि चविष्ट असते. त्यासाठी बाजारातील कैऱ्या फोडून लोणचे तयार केले जाते. त्यानंतर मातीच्या भांड्यात १५ ते २० दिवसांनी अधिक चवदार होते.
-------------------------------
कैरी फोडण्यासाठी अधिकचा खर्च
लोणचे तयार करण्यासाठी मसाला तयार झाल्यावर कैरी फोडणाऱ्याची गरज भासते. एक किलो कैरी फोडण्यासाठी १० ते २० रुपये मोजावे लागतात. फोडलेली कैरी रात्रभर फडक्यात बांधून ठेवली जाते. त्यामुळे तिचा आंबटपणा कमी होतो. अशा प्रकारे तयार झालेले लोणचे अधिक चवदार लागते.