पुरोगामी महाराष्ट्राची शिवध्वजातून ओळख

कळवा, ता. ७ (बातमीदार)ः शिवरायांच्या विचारांचा जागर व्हावा, या उद्देशाने शिवराज्याभिषेक दिनाचे औचित्य साधून कळवा येथील छत्रपती शिवाजी महाराज नगर येथे भव्य शिवध्वज डॉ.जितेंद्र आव्हाड यांच्या हस्ते लोकार्पित करण्यात आला. यावेळी आजचा शिवराज्याभिषेक दिन म्हणजे मराठी अस्मितेचा आणि महाराष्ट्राच्या पुरोगामित्वाची ओळख करून देणारा असल्याचे मत आव्हाड यांनी व्यक्त केले.
कळवा पूर्व येथे छत्रपती शिवाजी महाराज यांच्या शौर्याचा तसेच विचारांचा जागर व्हावा, या उद्देशाने भव्य शिवध्वज उभारण्यात यावा, अशी मागणी स्थानिक नागरिकांकडून करण्यात आली होती. त्याच अनुषंगाने सुमारे ५२ फूट उंचीच्या लोहस्तंभावर २० बाय ३० फूट आकारमानाचा शिवध्वज फडकत ठेवण्याची संकल्पना डॉ. जितेंद्र आव्हाड यांनी मांडली होती. शुक्रवारी शिवराज्याभिषेक दिनाचे औचित्य साधून या शिवध्वजाचे अनावरण करण्यात आले. यावेळी हा भगवा कोणच्या पक्षाची नाही तर मराठी अस्मितेची, त्यागाची आणि शौर्याची निशाणी आहे, असेही आव्हाड म्हणाले. या सोहळ्यात अरविंद मोरे, मा.नगरसेविका वर्षा मोरे, मा.नगरसेवक राजेश खारकर, नताशा आव्हाड, अभिजित पवार, राजेश कदम उपस्थित होते.
-----------------------------------------------
दुचाकीरॅलीत शिवप्रेमींची हजेरी
राष्ट्रवादी काँग्रेस-शरदचंद्र पवार पक्षाच्या पुढाकारातून दुचाकीची शिवरॅली काढण्यात आली. कळवा नाका येथील छत्रपती शिवाजी महाराज यांच्या पूर्णाकृती पुतळ्याला पुष्पहार अर्पण करून निघालेल्या रॅलीत शेकडो शिवप्रेमी कार्यकर्ते उपस्थित होते. छत्रपती शिवाजी महाराज, छत्रपती संभाजी महाराज यांच्या गौरवाच्या घोषणा देत कळवा नाका, कळवा परिसर अशी फिरून छत्रपती शिवाजी महाराज नगर येथे विसर्जित करण्यात आली.