मुद्रा क्रिएशनच्या कलाकारांनी परदेशात फडकावला भारतीय संस्कृतीचा झेंडा

‘मुद्रा’च्या कलाकारांनी परदेशात फडकवला संस्कृतीचा झेंडा
इंडोनेशिया व व्हिएतनाम येथे सांस्कृतिक दौरा
प्रभादेवी, ता. ७ (बातमीदार) : इंडोनेशिया व व्हिएतनाम येथे आयसीसीआर (इंडियन कौन्सिल फॉर कल्चरल रिलेशन्स)अंतर्गत सांस्कृतिक दौरा नुकताच पार पडला. यामध्ये मुद्रा क्रिएशनच्या १० कलाकारांनी परदेशात भारतीय संस्कृतीचा झेंडा अभिमानाने फडकवला. या सांस्कृतिक दौऱ्याचे आयोजन आयसीसीआर कार्यक्रम संचालक अनुराग सिंग व सोजी बेंजामिन यांनी केले होते.
इंडोनेशियात १५ दिवसांच्या या दौऱ्यात पिकानबारो, सुराबाया, मेडन (फेस्टिव्हल) आणि बाली या शहरांमध्ये शाळा, विद्यापीठ, सांस्कृतिक केंद्र अशा विविध ठिकाणी एकूण १३ नृत्यांचे सादरीकरण झाले. इंडोनेशियातील भारताचे ॲम्बेसेडर संदीप चक्रवर्ती, कॉन्स्युलेट जनरल रविशंकर गोयल, असिस्टंट कॉन्स्युलेट जनरल सुरेंद्र कुमार तसेच भारत सरकारचे वाणिज्य दूत मनोज भट्ट आणि बालीतील एसवीसीसी डायरेक्टर नवीन मेघवाल यांनी या कार्यक्रमांची योजना करून भारतीय कलाकारांना त्यांच्या प्रतिभेचे दर्शन घडवण्याची संधी दिली.
व्हिएतनाममध्ये एसव्हीसीसी संचालिका डॉ. मोनिका शर्मा यांनी चार कार्यक्रमांचे आयोजन केले. या दौऱ्यात मुद्रा क्रिएशनच्या अध्यक्षा सुगंधा धुळप व सचिव विनय धुळप यांच्या नेतृत्वाखाली नृत्य दिग्दर्शक सायली जाधव व मनीष वाघमारे यांच्या मार्गदर्शनाखाली प्रतीक्षा पडियार, मानसी राऊत, अनुष्का पै, अंकित गायकवाड, आर्यन शिंदे व जय धुळप या कलाकारांनी सादरीकरण केले.

विविध शैलीत १७ कार्यक्रम सादर
यात गणेश वंदना, कोळी नृत्य, लावणी, वासुदेव-शेतकरी, यक्षगान, दिंडी, गोंधळ आणि बॉलीवूडची शाहरुख खान यांना अर्पण केलेली खास नृत्ये अशा विविध शैलीत १७ कार्यक्रम सादर केले.