माजिवडा उड्डाणपुलावरील वाट बिकट

माजिवडा उड्डाणपुलावरील वाट बिकट
रस्त्याच्या दुरुस्तीचे काम अर्धवट
सकाळ वृत्तसेवा
ठाणे, ता. ७ : पावसाळ्यात पडणाऱ्या खड्ड्यांमुळे वाहतूक कोंडीत भर पडत असते. अशातच घोडबंदरहून नाशिक आणि ठाणेच्या दिशेने जाणाऱ्या माजिवडा उड्डाणपुलावरील वाहिनीवर सार्वजनिक बांधकाम विभागाने हाती घेतलेल्या दुरुस्तीचे काम अद्याप पूर्ण झाले नसल्याची बाब समोर आली आहे. ठाण्याकडे जाणाऱ्या वाहिनीवरील मास्टिक टाकण्याचे काम सुरू असल्याचा दावा सार्वजनिक बांधकाम विभागाकडून करण्यात येत आहे; मात्र तरी केवळ एकाच लेनचे काम झाले आहे. दुसऱ्या लेनवर रस्ता उखडलेला आहे. त्यावर खड्डे पडलेले आहे. त्यामुळे या रस्त्यावरून जाताना दुचाकीस्वारांना जीव मुठीत घेऊन प्रवास करावा लागणार आहे.

ठाणे पालिका क्षेत्रातून नाशिक-मुंबई महामार्गासह घोडबंदर रोडमार्गे पुढे वसई-विरार, गुजरातच्या दिशेने जाणारा महामार्ग जोडलेला आहे. अशातच या मार्गावर एमएसआरडीसी, सार्वजनिक बांधकाम विभाग आणि एमएमआरडीए या विभागांचे उड्डाणपूल आहेत. अशातच या दोन्ही महामार्गांवर हलक्या वाहनांसह अवजड वाहनांची दिवस-रात्र वर्दळ सुरू असते. अशातच पावसाळ्यात या मार्गावर पडणाऱ्या खड्ड्यांमुळे वाहनांचा वेग मंदावतो. परिणामी, वाहतूक कोंडी निर्माण होत असते.

पालिका प्रशासनाने मॉन्सूनपूर्व आढावा बैठक घेत, एमएसआरडीसी, सार्वजनिक बांधकाम विभाग आणि एमएमआरडीए यांना त्यांच्या अखत्यारित असलेल्या रस्त्यांवरील खड्डे बुजविण्याच्या सूचना केल्या होत्या. असे असतानाही घोडबंदरकडून ठाण्याच्या दिशेने येणाऱ्या माजिवडा उड्डाणपुलावर खड्डे पडले आहेत. तर, या उड्डाणपुलावरून यू टर्न घेऊन ठाण्याच्या दिशेने येणाऱ्या मार्गावर नादुरुस्त झालेल्या वाहिनीचे काम सार्वजनिक बांधकाम विभागाकडून हाती घेण्यात आले. हे काम पूर्ण करण्यासाठी पालिका प्रशासनाने ५ जूनची अंतिम मुदत दिली होती; मात्र अद्यापही या पुलाच्या दुरुस्तीचे काम पूर्ण झाले नसल्याचे दिसून येत आहे.

अवकाळीमुळे कामात अडथळा
अवकाळी पावसामुळे रस्त्याचे काम थांबल्याचे कारण सुरुवातीला पुढे केले होते. त्यानंतर आता मास्टिक टाकण्याचे काम सुरू असल्याचा दावा सार्वजनिक बांधकाम विभागाकडून करण्यात येत आहे. अशातच ठाण्याकडे जाणाऱ्या वाहिनीवरील एका लेनवर मास्टिक टाकले असून अद्यापही एक लेनचे काम अपूर्ण आहे. या लेनवरील रस्त्यावर चर मारून ठेवले असून अनेक ठिकाणी खड्डे पडले आहेत. अशातच पावसाचे पाणी त्यात जमा होत असल्यामुळे या लेनवरून दुचाकी व चारचाकी घेऊन जाताना वाहनचालकांना जीव मुठीत घेऊन प्रवास करावा लागत आहे.