मुलुंडमध्ये सोमवारी शिवसेनेचा एल्गार

मुलुंडमध्ये सोमवारी शिवसेनेचा एल्गार
पुनर्वसनाविरोधात ठरवणार आंदोलनाची दिशा
मुलुंड, ता. ७ (बातमीदार) : मुंबईतील जमिनीचा वापर धारावी पुनर्विकासासाठी होणार असून, या प्रकल्पात काय त्रुटी आहेत, या प्रकल्पाचा काय परिणाम होणार, यासंबंधीचे एक सादरीकरण युवासेना प्रमुख आदित्य ठाकरे मुलुंड येथे सोमवारी (ता. ९) करणार आहेत. या सभेत धारावी पुनर्विकासाविरोधातील आंदोलनाची पुढील दिशा ठरवण्यात येणार आहे.
मुलुंड पश्चिमेतील कालिदास सभागृहत सोमवारी सायंकाळी सहा वाजता ‘लढा आपल्या मुंबई’चा याअंतर्गत एक सभा आयोजित केली असून, मुलुंड, कुर्ला, कांजूरमार्ग, विक्रोळी, मालाड आणि धारावी इत्यादी ठिकाणचे रहिवासी या सभेला उपस्थित राहणार आहेत. या वेळी आदित्य ठाकरे उपस्थितांना मार्गदर्शन करणार असून, धारावी पुनर्विकासात काय त्रुटी आहेत, हा प्रकल्प मुंबईवर काय परिणाम करणार, याचे एक सादरीकरण करणार आहेत. शिवसेना ठाकरे गटातर्फे पुनर्विकासाविरोधात लढा उभारण्यात येणार असून, या वेळी आंदोलन करण्याची दिशादेखील ठरवण्यात येणार आहे.