बाजारात फणसाची आवक वाढली

बाजारात फणसाची आवक वाढली
घाऊक बाजारात १५ ते २० रुपये किलो भावाने विक्री
तुर्भे, ता. ८ (बातमीदार) ः एकीकडे आंब्याची आवक कमी झालेली असताना, दुसरीकडे फणसाची आवक मात्र वाढली आहे. फणस आता मोठ्या संख्येने बाजारात दाखल झाला असून, स्‍थानिक बाजारात घमघमाट सुटला आहे. फणसाची गोडी चाखण्यासाठी ग्राहक गर्दी करत आहेत. वटपौर्णिमा येत्या मंगळवारी येत असल्याने घाऊक बाजारात कच्च्यासोबत पिकलेल्या फणसाची चांगली आवक सुरू झाली आहे. वाशी येथील एपीएमसीच्या घाऊक बाजारात १५ ते २० रुपये किलो भावाने त्याची विक्री होत आहे.
पतीच्या दीर्घायुष्यासाठी महिला वटपौर्णिमेचा उपवास पकडतात. या वेळी महिला एकमेकींना फळाचे वाण देत असतात. या वाणात आंब्यासह फणसाच्या गरांना मोठे महत्त्व आहे. घरात गोडधोड पदार्थ म्हणून स्त्रिया बरका फणसाच्या पोळ्या बनवतात, तर कापा फणस वाण भरण्यासाठी वापरतात. त्याच पार्श्वभूमीवर वटपौर्णिमेच्या तीन-चार दिवस आधीच कोकणातून मोठ्या प्रमाणात एपीएमसीच्या घाऊक बाजारात फणस दाखल होण्यास सुरुवात झाली आहे. शनिवारी बाजारात १५ गाड्यांमधून एकूण १२५० क्विंटल फणस दाखल झाला होता. घाऊक बाजारात याचे १५ ते २० रुपये किलो भाव असले तरी किरकोळ बाजारात ते नगाप्रमाणे विकले जात आहेत. किरकोळ बाजारात साधारण ३०० ते ४०० रुपये नग अशी फणसाची किंमत आहे. वटपौर्णिमेनिमित्त फणसाची आवक वाढली असून, पुढील एक ते दोन दिवसात ती आणखीन वाढणार असल्याचे सांगण्यात येत आहे.
...............
कापा फणसाला अधिक मागणी
कच्चा फणसासोबत पिकलेले फणसही आता मार्केटमध्ये मोठ्या संख्येने येऊ लागले आहेत. हे भाजीचे गोड फणस आकारानुसार १०० ते ४०० रुपये अशा भावात विक्री करण्यात येत आहेत. यात कापा फणसाला अधिक मागणी आहे. मे महिन्याच्या ऐन हंगामात पाऊस कोसळल्यामुळे त्याचा काही प्रमाणात फटका फणसाला बसला आहे. पावसामुळे फणसाचे नुकसान झाल्याचे विक्रेत्यांनी सांगितले, मात्र फसणाची खरेदी सध्या जोरदार सुरू असल्याचे विक्रेते म्हणाले.