विद्यार्थ्यांच्या भवितव्याशी खेळ

सकाळ वृत्तसेवा
ठाणे, ता. ८ ः शाळा सुरू होण्यास काही दिवसांचा अवधी शिल्लक असताना दिव्यातील अनधिकृत शाळांचा प्रश्न अजूनही सुटलेला नाही. येथील काही अनधिकृत शाळा मान्यतेसाठी धडपडत आहेत, मात्र सीआर झेडच्या जाचक अटींमुळे त्यांना ओसी मिळणे कठीण झाले आहे, तर मान्यतेसाठी आवश्यक असलेली ऑनलाइन प्रक्रियाही बंद असल्याने २५ हजार विद्यार्थ्यांचे भवितव्य टांगणीला लागले आहे.
ठाणे महापालिकेने पालिका क्षेत्रातील अनधिकृत शाळांची यादी नुकतीच जाहीर केली आहे. दिव्यासह ठाणे पालिका क्षेत्रातील ८२ शाळा यादीमध्ये आहेत. एकट्या दिवा शहरातील ६० पेक्षा जास्त अनधिकृत शाळा असून, जवळपास २५ हजार पेक्षा जास्त विद्यार्थी शिक्षण घेत आहेत, तर एक हजार २०० शिक्षक आणि शिक्षकेतर कर्मचारी काम करत आहेत. अशातच भौगोलिक परिस्थितीमुळे सीआरझेडच्या जाचक अटींचा विचार करता दिवा शहरात अधिकृत शाळा बांधणे तांत्रिकदृष्ट्या शक्य नाही. त्यामुळे अधिकृत शाळांमध्ये विद्यार्थ्यांच्या समायोजनेची प्रक्रिया सुरू आहे, पण दोन वर्षांपासून नवीन शाळा मान्यतेची ऑनलाइन प्रक्रिया बंद असल्यामुळे तसेच दिवा शहरात ओसी, सीसीच्या तांत्रिक अडचणींमुळे विद्यार्थ्यांचे समायोजन करण्यात अडचणी उद्भवत आहेत.
------------------------------------------
२५ हजार मुलांच्या शिक्षणाचा प्रश्न
- दिवा शहरात राहण्यासाठी आलेल्या सर्वसामान्य नागरिकांना परवडतील, अशा शाळा दिवा शहरात मोठ्या प्रमाणात सुरू झाल्या आहेत, मात्र या शाळांना मान्यता नसल्यामुळे शाळा बंद कराव्यात, अशी मागणी दिवा शहरातील काही मान्यताप्राप्त शाळा संचालकांनी काही विरोधी पक्षातील राजकीय स्थानिक पुढाऱ्यांना हाताशी धरून केल्याचा आरोप होऊ लागला आहे.
- या अनधिकृत शाळांना पालिकेने नोटिसा बजावून दंडवसुली सुरू केली आहे. तसेच या शैक्षणिक वर्षात या शाळा सुरू होऊ न देण्याचा पवित्रा घेतला आहे. त्यामुळे दिवा शहरातील २५ हजार पेक्षा जास्त विद्यार्थ्यांचे वर्ष वाया जाण्याच्या भीतीमुळे पालकांमध्ये चिंतेचे वातावरण आहे.
------------------------------------------
शिंदे गट मदतीसाठी सरसावला
दिवा शहरातील सर्व अनधिकृत शाळांच्या संचालकांनी खासदार डॉ. श्रीकांत शिंदे यांची भेट घेऊन त्यांना निवेदन दिले होते. खासदार डॉ. शिंदे यांच्या सूचनेनुसार नुकतेच ३० पेक्षा जास्त अनधिकृत शाळांच्या संचालकांनी शिवसेना शहरप्रमुख रमाकांत मढवी यांच्या नेतृत्वात ठाणे पालिका आयुक्त सौरभ राव यांची भेट घेतली होती. या भेटीत सर्व अनधिकृत शाळांना मान्यता मिळवण्यासाठी प्रक्रिया सुरू करावी, असे आश्वासन आयुक्तांनी दिले.
----------------------------------------
शिक्षणमंत्र्यांची भेट घेणार
विद्यार्थ्यांच्या भवितव्यासाठी मान्यता नसलेल्या शाळांना न्याय मिळवून देण्यासाठी शिवसेना प्रयत्न करणार असल्याचे रमाकांत मढवी यांनी सांगितले. सर्व शाळांना घेऊन खासदार डॉ. श्रीकांत शिंदे यांच्या मार्गदर्शनाखाली शालेय शिक्षणमंत्री दादा भुसे यांचीदेखील भेट घेण्यात येणार आहे.