धोकादायक वृक्षांची आकडेवारी गुलदस्त्यात

तुर्भे, ता. ८ (बातमीदार) : मे महिन्यापासून सुरू झालेल्या पावसाच्या दमदार हजेरीनंतर नवी मुंबई शहरातील विविध ठिकाणी धोकादायक झाडांची पडझड सुरू आहे. नऊ दिवसांत ४९ झाडांची पडझड झाली असून, तीन फांद्या पडल्या असल्याची माहिती महापालिकेच्या आपत्कालीन विभागाकडून देण्यात आली; मात्र शहरातील धोकादायक झाडांची संख्या गुलदस्त्यातच आहे. त्यामुळे दररोज कुठे ना कुठे पावसामुळे झाडे पडत आहेत.
नवी मुंबई शहरात मे महिन्यापासूनच पावसाने हजेरी लावली आहे. या पावसात शहरातील झाडांची पडझड वाढली आहे. २६ मेपासून ते आतापर्यंत ४९ झाडे उन्मळून पडली असून, तीन झाडांच्या फांद्या पडल्या आहेत. पडलेल्या झाडांमध्ये ठिसूळ असलेली गुलमोहरची झाडे अधिक आहेत. काही वर्षांपूर्वी नवी मुंबई शहरात निसर्ग वादळात मोठ्या प्रमाणावर वृक्षांची पडझड झाली होती. सोसाट्याच्या वाऱ्याने शहरातील बऱ्याच विभागात, पाम बीच मार्गावार नेरूळ आणि वाशीमध्ये मोठ्या प्रमाणात झाडे उन्मळून पडली होती. सध्या शहरात पाऊस सुरू असून, मोठ्या संख्येने वृक्ष कोसळून पडत आहेत. ही झाडे वाहनांवर पडल्याने वाहनांचेदेखील नुकसान होत आहेत. १ जूनला नेरूळमध्ये झाड पडून पाच गाड्यांचे नुकसान झाल्याची घटना घडली; मात्र कुठेही जीवितहानी झालेली नाही.
-------------------
विभागवार आकडेवारीच जाहीर नाही
नवी मुंबई शहरात दरवर्षी मॉन्सूनपूर्व विभागवार धोकादायक वृक्षांची गणना करून त्यावर कार्यवाही केली जाते. महापालिकेच्या उद्यान विभागाने अद्याप ही आकडेवारी जाहीर केली नाही. मागील महिन्यात ठाण्यामध्ये झाड पडून लहान मुलाचा मृत्यू; तर गत आठवड्यात विक्रोळीत झाड पडून एका तरुणाचा जीव गेला होता. पावसाळ्यात धोकादायक वृक्ष पडून कुठलीही वित्तहानी किंवा जीवितहानी होऊ नये म्हणून उद्यान विभागामार्फत शहरातील धोकादायक वृक्षांची छाटणी अगर ती तोडली जातात; मात्र अशा धोकादायक वृक्षांच्या आकडेवारीबाबत उद्यान उपायुक्तच अनभिज्ञ असल्याने आश्चर्य व्यक्त केले जात आहे.