श्रीवर्धन आदर्श शहर बनण्याच्या मार्गावर

श्रीवर्धन आदर्श शहर बनण्याच्या मार्गावर
खासदार सुनील तटकरे यांचे प्रतिपादन
श्रीवर्धन, ता. ८ (वार्ताहर) ः सौरऊर्जेवर चालणारे स्ट्रीट लाइट आणि प्लॅनेटेरियम या दोन्ही प्रकल्पांमुळे श्रीवर्धन आधुनिक महाराष्ट्राचे एक आदर्श शहर बनण्याच्या मार्गावर आहे, असे प्रतिपादन खासदार सुनील तटकरे यांनी भूमिपूजनदरम्यान केले. ऑइल इंडिया लिमिटेड यांच्या सीएसआर फंडातून पर्यटकांकरीता प्लॅनेटेरियम विकसित करण्याबरोबर सौरऊर्जेवर चालणारे सुशोभित स्ट्रीट लाइट पोल बसविण्यात येत आहेत. त्‍याचे भूमिपूजन आज खासदार सुनील तटकरे यांच्या हस्‍ते करण्यात आले.
या भूमिपूजन सोहळ्यावेळी महिला व बालविकास मंत्री आदिती तटकरे यांनी सांगितले की, श्रीवर्धन शहराला आता प्रगती प्राप्त होत आहे. सुसज्ज प्लॅनेटेरियम केंद्र हे विद्यार्थ्यांसाठी वैज्ञानिक जाणिवा विकसित करणारा अभिनव उपक्रम आहे. पर्यावरणपूरक ऊर्जेच्या दिशेने महत्त्वाचे पाऊल म्हणजेच ३० किलो वॉट क्षमतेची सौरऊर्जा प्रणाली शहरात बसविण्यात येत आहे. त्याचप्रमाणे स्मार्ट पोल्स व हाईमास्ट लाइट्समुळे शहराची शोभा वाढणार आहे. हे दोन्ही प्रकल्प श्रीवर्धनच्या नागरी सुविधा, पर्यावरणीय संतुलन आणि शैक्षणिक विकास यांचा समन्वय साधत शहराला प्रगतीच्या दिशेने नेणारे ठरतील, असा मला विश्वास आहे. श्रीवर्धन हे‌ ऐतिहासिक व सांस्कृतिक शहर आहे, परंतु भविष्यात पर्यटन, शिक्षण आणि विज्ञानाचे एक केंद्र होणार आहे. ऑइल इंडिया लिमिटेड यांच्या सीएसआर फंडातून पर्यटकांकरिता मठाचा गवंड परिसरात प्लॅनेटेरियम आणि स्ट्रीट लाइट व पोल बसविण्यात येत आहे. या वेळी खासदार तथा भारतीय पेट्रोलियम व गॅस नियामक मंडळाचे चेअरमन सुनील तटकरे आणि महिला व बालविकास मंत्री आदिती तटकरे उपस्‍थित होते. याप्रसंगी श्रीवर्धन नगर परिषद मुख्याधिकारी विराज लबडे, श्रीवर्धन मतदारसंघ अध्यक्ष मोहम्मद मेमन, तालुका अध्यक्ष दर्शन विचारे, माजी नगराध्यक्ष सातनाक, अनंत गुरव तसेच पदाधिकारी व कार्यकर्ते आणि नगर परिषद कर्मचारी उपस्थित होते.