अत्रे रंगमंदिर, झुंजारराव संकुलाची दुरुस्ती निकृष्ट दर्जाची

कल्याण, ता. ८ (वार्ताहर) : कल्याण-डोंबिवली महापालिकेच्या अखत्यारीत असलेल्या कल्याण पश्चिमेतील आचार्य प्रल्हाद केशव अत्रे रंगमंदिर व शंकरराव झुंजारराव संकुल या इमारतीच्या दुरुस्तीचे काम सद्यस्थितीत सुरू आहे. चालू असलेले हे काम अत्यंत निकृष्ट दर्जाचे आहे. निविदेमधील अटी व शर्तीचे सर्रास उल्लंघन केले जात आहे. त्यामुळे संबंधित ठेकेदारावर कारवाई करून त्याचे बिल रोखण्याची मागणी राष्ट्र कल्याण पक्षाचे महासचिव राहुल काटकर यांनी पालिकेच्या शहर अभियंता यांच्याकडे पत्राद्वारे केली आहे.
कामामध्ये वापरण्यात आलेले साहित्य हे मान्यताप्राप्त दर्जाचे नसून स्थानिक दर्जाचे आहे. काम करण्याची पद्धत अयोग्य व अर्धवट असल्याने मोठ्या प्रमाणात त्रुटी दिसून येत आहेत. महापालिकेच्या अधिकाऱ्यांची कामावर प्रत्यक्ष देखरेख नसल्याने ठेकेदार मनमानी पद्धतीने काम करत आहे. अशा दर्जाहीन व नियमबाह्य कामामुळे महापालिकेच्या निधीचा अनावश्यक अपव्यय होत आहे. या दुरुस्ती व नूतनीकरण कामाची तृतीय पक्षामार्फत गुणवत्ता तपासणी करण्यात यावी. जेणेकरून कामाची गुणवत्ता निदर्शनास येईल. निकृष्ट दर्जाचे व अटींचे उल्लंघन केलेल्या कामासाठी ठेकेदाराला कोणतेही बिल अदा करण्यात येऊ नये आणि ठेकेदारावर नियमांनुसार दंडात्मक व कायदेशीर कार्यवाही करत काळ्या यादीमध्ये टाकण्यात यावे. महापालिकेची दिशाभूल आणि फसवणूक करून भ्रष्टाचार करणाऱ्यांवर कायदेशीर गुन्हा दाखल करण्यात यावा आणि कर्तव्यात कसूर करून ठेकेदारांना पाठीशी घालणाऱ्या अधिकाऱ्यांवर शिस्तभंगाची कार्यवाही करण्याची मागणी काटकर यांनी केली आहे.