खारघरमध्ये कमी दाबाने पाणीपुरवठा

खारघर, ता.९ (बातमीदार) : खारघर वसाहतीत काही सेक्टरमध्ये कमी दाबाने पाणीपुरवठा होत असल्यामुळे नागरिकांमध्ये नाराजी पसरली आहे. धरणात साठा कमी असल्यामुळे पाणी कमी दाबाने येत आहे. त्यामुळे नागरिकांनी पाणी जपून वापरावे, असे आवाहन सिडकोकडून करण्यात आले आहे.
खारघर वसाहतीमधील पाणी समस्या दूर होण्याऐवजी दिवसेंदिवस वाढ होताना दिसत आहे. खारघर सेक्टर १८ ते २१ सेक्टरमध्ये गेल्या आठवडाभरापासून कमी दाबाने पाणीपुरवठा होत असल्याच्या नागरिकांच्या तक्रारी आहेत. सिडकोच्या पाणीपुरवठा विभागाचे उपअभियंता राहुल सरोदे यांच्याशी संपर्क करण्याचा प्रयत्न केल्यास ते फोन उचलत नाहीत. त्यामुळे कोणाशी संपर्क साधावा, असा प्रश्न नागरिकांना पडला आहे. दरम्यान, काही दिवसांपूर्वी खारघरमधील भाजप, शिवसेना ठाकरे गट, खारघर कॉलनी फोरमने सिडकोच्या पाणीपुरवठा विभागाचे कार्यकारी अभियंता गायकवाड यांच्याशी भेट घेऊन पाणी समस्यांचा पाडा वाचला असता जलवाहिनी दुरुस्तीची कामे अंतिम टप्प्यात असून, मे अखेरपर्यंत खारघरला लवकरच पुरेसे पाणी उपलब्ध करून दिले जाईल, असे आश्वासन दिले होते; मात्र जून महिना सुरू होऊनही पुरेसे पाणी उपलब्ध होत नसल्यामुळे सिडकोच्या ढिसाळ नियोजनामुळे नागरिकांमध्ये नाराजी पसरली आहे.
---------------------
धरणातील साठा कमी
सेक्टर-१८मधील रहिवासी शांताराम फटांगरे म्हणाले, ४ जूनपासून सिडकोकडून कमी दाबाने पाणीपुरवठा होत असल्यामुळे बाहेरून पाणी विकत घ्यावे लागत आहे. कमी दाबाने पाणीपुरवठा होत असल्यास सिडकोने जाहीर करणे आवश्यक आहे. सिडको पाणीपुरवठा विभागाचे कार्यकारी अभियंता भगवान गायकवाड यांच्याशी संपर्क केला असता, धरणातील साठा कमी होत आहे. त्यामुळे पाणीपुरवठा कमी होत आहे. त्यामुळे नागरिकांनी पाणी जपून वापरावे, असे सांगितले.