वटपौर्णिमेनिमित्त फणस खरेदीसाठी ग्राहकांची गर्दी

वटपौर्णिमेनिमित्त फणस खरेदीसाठी ग्राहकांची गर्दी
लालबाग, परळ, दादरमध्ये बाजारपेठ सजली
प्रभादेवी, ता. ९ (बातमीदार) : वटपौर्णिमेच्या पार्श्वभूमीवर कोकणातून येणारे मधुर फणस मुंबईच्या बाजारपेठेत दाखल झाले असून, फणस खरेदीसाठी ग्राहकांची मोठी गर्दी पाहायला मिळत आहे.
कोकणातील सुपीक मातीतला हा गोड फणस आता मुंबईत चाकरमान्यांच्या पसंतीस उतरत असून, लालबाग, परळ, दादर, ठाणे परिसरात फणसाचे मोठे ढीग लक्ष वेधून घेत आहेत. वटपौर्णिमेच्या निमित्ताने या फणसाला तसेच खासकरून काप्या फणसाला विशेष मागणी असते. त्यामुळे मुंबईसह उपनगरांतही फणस खरेदीसाठी ग्राहकांची गर्दी पाहायला मिळत आहे.
चिपळूण तालुक्यातील वारेली गावचे शेतकरी महेश आंब्रे यांनी आपल्या शेतात पिकवलेला फणस थेट मुंबईत विक्रीसाठी आणला असून, ग्राहकांचा चांगला प्रतिसाद मिळत असल्याचे त्यांनी सांगितले. कोकणातील तरुण आता व्यवसायाकडे वळली असून, शेतात पिकविलेला माल थेट मुंबईच्या बाजारपेठामध्ये विक्रीसाठी आणत आहेत. त्यामुळे मुंबईवासीयांना देखील थेट शेतातला माल स्वस्त भावात मिळत आहे.