कातकरी वाडीत ‘समृद्धीच्या वाटा’

मुरबाड, ता. ९ (वार्ताहर )ः नावीन्यपूर्ण उपक्रमांमुळे चर्चेत असलेल्या शेलारीतील गुलाबी कातकरी वाडीत ‘समृद्धीच्या वाटा’ हा अभिनव उपक्रम करण्यात आला. यानिमित्ताने ५०० आदिवासी महिलांसोबत विविध क्षेत्रातील मान्यवरांनी संवाद साधताना जीवनावश्यक वस्तूंचे वाटप करण्यात आले.
आरोग्य, शिक्षण, पर्यावरण, रोजगार, व्यसनमुक्ती, चंदन परिषदेच्या माध्यमातून गुलाबी कातकरी वाडीने विशेष प्रगती केली आहे. कातकरी समाजाने यातून काहीतरी बोध घ्यावा म्हणून रविवारी (ता. ८) शांताराम बाबू बांगर यांच्या शेलारी म्हाडस येथील शांताई निसर्ग पर्यटन केंद्रात हा उपक्रम करण्यात आला. कार्यक्रमाची सुरुवात पारंपरिक नृत्य तसेच ढोल-ताशांच्या गजरात झाले. या वेळी सजवलेल्या बैलगाडीतून मुंबईचे उपजिल्हाधिकारी बाळासाहेब खांडेकर यांची मिरवणूक काढण्यात आली. याप्रसंगी गुलाबी वाडीतील मुलींनी आदिवासी नृत्याचे सादरीकरण केले. या वेळी उपजिल्हाधिकारी बाळासाहेब खांडेकर यांनी कातकरी समाजाच्या प्रगतीसाठी अशा उपक्रमांची गरज व्यक्त केली. ठाणे जिल्हा परिषदेच्या शिक्षणाधिकारी (योजना) भावना राजभोर यांनी आजीबाईची शाळा, आई शाळा उपक्रमांचे कौतुक केले, तर मुरबाडचे वरिष्ठ पोलिस निरीक्षक संदीप गिते यांनी वनौषधींचे ज्ञान सर्वांपर्यंत जाण्यासाठी प्रयत्न व्हावेत, असे सांगितले.
----------------------------------
विविध उपक्रमांतून संवाद
- दिनेश माळी, नारायण घावट, भालचंद्र गोडांबे यांनी स्वाक्षरी उपक्रमात मदत केली. मानवसेवा सामाजिक संस्था, सुरेश बांगर, सखी कार्यकर्ती संस्था विलेपार्ले यांचे योगदान लाभले. टीम परिवर्तन, अंघोळीची गोळी संस्थेचे अविनाश पाटील यांनी पर्यावरण जनजागृतीसाठी स्वतंत्र दालन उभे केले होते. शाळकरी मुलांसोबत सर्पमित्र सुहास पवार, साहसी वीर अजित कारभारी यांनी संवाद साधला.
- साबण, अगरबत्ती, उटणे प्रशिक्षक चेतन पोतदार यांनी महिलांना साबण बनवण्यास शिकवले, तर सामाजिक कार्यकर्ते तानाजी घागस, वनौषधी मित्र उमेश चौधरी, रानभाज्यांबाबत अलका वाघ, महेश रूमाले, बांबूकाम संताजी घोरपडे, पक्षिमित्र प्रवीण विशे, चंदन मार्गदर्शक अमोल रोंगे, निसर्ग उपचार केंद्राच्या रेखा नाईक, संतोष मार्केंनी मार्गदर्शन केले.