वृद्धेला लुटणारे दोघे २४ तासांत जाळ्यात

नवी मुंबई, ता. ९ (वार्ताहर) : कोपरखैरणे भागात राहणाऱ्या ६८ वर्षीय वृद्ध महिलेची तब्बलचा लाख ९० हजारांची सोनसाखळी खेचणाऱ्या लुटारूला आणि त्याला या कामात मदत करणाऱ्या त्याच्या सहकाऱ्याला कोपरखैरणे पोलिसांनी २४ तासांत अटक केली आहे. त्यांच्याकडून वृद्धेची लुटलेली सात तोळ्यांची सोनसाखळी हस्तगत केली आहे. अशोक किमया गौडा (३५) आणि नजरउल्ला नरुउल्ला पठाण (४०) अशी या दोघा लुटारूंची नावे आहेत.
कोपरखैरणे सेक्टर १४मध्ये राहणाऱ्या भानुमती अम्बुमनी (६८) या गुरुवारी (ता. ५) रात्री पावणेअकरा वाजण्याच्या सुमारास गुलाबसन्स डेअरीजवळून पायी चालत आपल्या घराच्या दिशेने जात होत्या. त्या वेळी त्यांच्यावर पाळत ठेवून असलेल्या अशोक गौडा या आरोपीने त्यांच्या गळ्यातील सात तोळ्यांची चार लाख ९० हजारांची सोनसाखळी खेचून पळ काढला. त्या वेळी भानुमती यांनी आरडाओरड करण्याचा प्रयत्न केला; मात्र तो लुटारू रस्ता ओलांडून पळून गेला. या घटनेनंतर भानुमती यांनी कोपरखैरणे पोलिस ठाण्यात तक्रार दाखल केल्यानंतर वरिष्ठ पोलिस निरीक्षक औदुंबर पाटील यांच्या मार्गदर्शनाखाली पोलिस उपनिरीक्षक मंगेश कन्नेवाड व त्यांच्या पथकाने या प्रकरणाच्या तपासाला सुरुवात केली. या तपासात पोलिसांनी घटनास्थळ व आजूबाजूच्या परिसरातील सीसीटीव्हींची पडताळणी केली असता, अशोक गौडा याने दागिने खेचल्याचे निष्पन्न झाले. त्यानुसार पोलिसांनी कोपरखैरणे सेक्टर १९मधून त्याला अटक केली.
---------------
मदत करणारा साथीदार शिरवणेतून अटकेत
पोलिसांनी अशोक गौडा याच्याकडे केलेल्या चौकशीत गुन्ह्याच्या वेळी नेरूळमधील शिरवणे येथे राहणारा आरोपी नजरउल्ला पठाण हा त्याच्यासोबत संपर्कात असल्याचे तसेच त्याच्या सांगण्यानुसार त्याने भानुमती यांच्या गळ्यातील दागिने खेचल्याचे तपासात आढळून आले. त्यानुसार नजरउल्ला पठाण यालादेखील अटक करण्यात आल्याचे पोलिस उपनिरीक्षक कन्नेवाड यांनी सांगितले. या दोन्ही आरोपींकडून त्यांनी लुटलेले सर्व दागिने हस्तगत करण्यात आल्याचेही त्यांनी सांगितले. न्यायालयाने या दोघांची न्यायालयीन कोठडीत रवानगी केली आहे.