बकरी ईदमुळे पालिका मालामाल

भिवंडी, ता. ९ (वार्ताहर)ः शहरात बकरी ईद उत्साहात साजरी करण्यात आली. याच अनुषंगाने महापालिकेने शहरातील ५६ ठिकाणी कुर्बानी केंद्राची व्यवस्था केली होती. या केंद्रांवर ८,०६७ जनावरांच्या कुर्बानीतून १७ लाख ८९ हजारांचा महसूल पालिकेच्या तिजोरीत जमा झाला आहे.
बकरी ईदसाठी ५६ कुर्बानी केंद्राकरिता विविध वाहन, तर कुर्बानीनंतर तेथील भागाची स्वच्छता करण्यासाठी पाण्याचे टँकरची पूर्वनियोजित व्यवस्था करण्यात आली होती. या वेळी जनावरांची तपासणी करण्याकरिता पशुवैद्यकीय विभागाकडून ६० पशुवैद्यकीय अधिकारीसुद्धा नियुक्त होते. प्रत्येक प्रभाग समितीनिहाय वाहनांचे आदल्या दिवशीच प्रभाग समितीमध्ये रवाना करण्यात आली होती. ज्यामुळे कुर्बानीनंतर अपशिष्ट उचलणे, तेथे पाण्याने स्वच्छता करणे आणि औषध फवारणी करणे, अशी कामे वेळेआधीच पूर्ण करण्यात आरोग्य विभागाला यश आले. तसेच मार्केट, आरोग्य, पाणीपुरवठा, वाहन विभाग तसेच पशुवैद्यकीय अधिकारी आणि पोलिस प्रशासन यांच्यातील समन्वयामुळे बकरी ईदचा सण शांततेत पार पडला.
--------------------------------------------
चोख नियोजनाची प्रशंसा
महापालिकेने केलेल्या नियोजनाचे स्थानिक नागरिक, माजी नगरसेवक तसेच समाजसेवकांनी प्रशंसा केली आहे. तसेच महापालिकेचे प्रशासक तथा आयुक्त अनमोल सागर यांच्यासह सहकार्य करणाऱ्या सर्व अधिकारी आणि कर्मचाऱ्यांच्या कामाचे कौतुक केले.