भुयारी मार्गाला हाइटगेजचा फटका

भुयारी मार्गाला हाइटगेजचा फटका
सानपाडा रेल्वेस्थानकात वाहतूक कोंडी
तुर्भे, ता. ९ (बातमीदार) ः सानपाडा रेल्वेस्थानकाच्या भुयारी मार्गामध्ये सदोष हाइटगेजचा वाहनचालकांना फटका बसत आहे. उंची जास्त असलेली वाहने भुयारी मार्गात अडकून पडत आहेत. याचा फटका परिसरातील नागरिकांना बसत आहे. वारंवार मागणी करूनही हाइटगेजची दुरुस्ती होत नसल्यामुळे वाहनचालकांमध्ये असंतोष निर्माण झाला आहे.
सिडकोने नियोजन करून वसवलेल्या सानपाडा नोडमध्ये गरजेनुसार सोयी-सुविधांचा अभाव दिसून येत आहे. हार्बर रेल्वे मार्गाच्या पश्चिमेकडे वसलेल्या नोडमध्ये प्रवेश करण्यासाठी एकच मार्ग आहे. पर्यायी मार्ग नसल्याने सानपाड्यातील रहिवाशांना रोज वाहतूक कोंडीला सामोरे जावे लागते. सानपाडा रेल्वेस्थानकापासून पूर्व-पश्चिम असा प्रवास करण्यासाठी एकच भुयारी मार्ग हा पर्याय आहे. या भुयारी मार्गातील खड्ड्यांचा प्रश्न सोडविण्यासाठी सिडको प्रशासनाने काँक्रीटीकरण केले आहे, परंतु काँक्रीटीकरणाच्या कामामुळे रस्ता व छत याचे अंतर कमी झाले आहे. या मार्गातून कार, दुचाकी, रिक्षा आदी वाहने ये-जा करतात. माल वाहतूक करणारी तीनचाकी व चारचाकी वाहने भुयारी मार्गातून जाऊ शकत नाहीत. ही वाहने भुयारी मार्गातून जावू नये, यासाठी दोन्ही बाजूला उंचीच्या मर्यादेसाठी लोखंडी कमान बसविली आहे, परंतु ते सदोष असल्याने अनेक वाहने या हाइटगेजमधून आतमध्ये येतात व भुयारी मार्गात जाऊन अडकतात. त्यामुळे भुयारी मार्गात वाहतूक कोंडी होत असून वाहनचालक मेटाकुटीला आले आहेत. त्‍यामुळे हाइटगेजची उंची भुयारी मार्गापेक्षा थोडी कमी केल्यास जास्त उंचीची वाहने ये-जा करू शकणार नाहीत, त्यामुळे वारंवार होणाऱ्या वाहतूक कोंडीला रोख बसेल, अशी मागणी शिवसेना उपजिल्हाप्रमुख मिलिंद सूर्यराव यांनी सिडको, पालिका व वाहतूक विभागाकडे निवेदनातून केली आहे.