सावित्रीच्या लेकी करणार वडाची लागवड

नवी मुंबई, ता. ९ : सणांच्या निमित्ताने पर्यावरणाचा समतोल राखण्याकरिता वृक्षलागवड करण्याचा अभिनव उपक्रम नवी मुंबई महापालिकेने हाती घेतला आहे. वटपौर्णिमा सणाच्या दिवशी वडाच्या झाडाची पूजा करून धागा बांधण्याची महिलांवर्गामध्ये प्रथा आहे. या सणाचे औचित्य साधून नवी मुंबई महापालिकेतर्फे वडाची लागवड केली जाणार आहे. महिला बचत गट आणि महापालिकेच्या महिला कर्मचाऱ्यांतर्फे वडाचे रोपटे लागवड करून वटपौर्णिमा साजरी केली जाणार आहे.
पावसाळ्यात श्रावणाआधी येणारा आणि महिलावर्गामध्ये विशेष लोकप्रिय असणारा सण म्हणजे वटपौर्णिमा. या दिवशी महिला आपल्या पतीच्या आरोग्यासाठी आणि दीर्घायुष्यासाठी पूजा करतात. वडाच्या झाडाला धागा बांधतात. या सणात वडाच्या झाडालाही विशेष महत्त्व आहे. ही बाब लक्षात घेऊन महापालिकेच्या उद्यान विभागाने झाडे लागवड करताना देशी प्रजातींच्या वृक्षलागवडीवर भर दिला आहे. वटपौर्णिमेच्या निमित्ताने शहरातील महिला बचत गट आणि महापालिका मुख्यालयातील महिला कर्मचाऱ्यांना वडाचे रोपटे लागवड करण्यासाठी दिले जाणार आहे. महिला बचत गटातर्फे बेलापूर येथील मँगो गार्डनमध्ये वडाच्या रोपांची लागवड केली जाणार आहे. महापालिका मुख्यालयाच्या परिसरात महिला कर्मचारी आणि महिला बचत गटाच्या प्रतिनिधींच्या हस्ते लागवड होणार आहे, अशी माहिती उद्यान विभागाचे उपायुक्त किसनराव पलांडे यांनी दिली.
---------------------
पाच हजारांहून अधिक वटवृक्ष
नवी मुंबईत वृक्षगणना करण्यात आली आहे. त्यानुसार शहरात १५ लाखांपेक्षा अधिक वृक्ष आहेत. ५० वर्षांपेक्षा अधिक वर्षे वय असणाऱ्या झाडांचा हेरिटेज वृक्षांमध्ये समावेश होतो. अशी ३५० पेक्षा जास्त वृक्षसंपदा शहरात आहे. नवी मुंबईत पाच हजार ६११ वडाची जुनी झाडे आहेत. सध्या नवी मुंबई महापालिकेचे आयुक्त डॉ. कैलास शिंदे यांनीही देशी प्रजातींच्या झाडांच्या लागवडीवर भर दिला आहे. अलीकडच्या काळात विकासकामांच्या आड येणारी झाडे तोडली जात आहेत. अशा परिस्थितीत अनेक जण वडाच्या झाडांच्या फांद्या आणून पूजा करीत असतात. या धर्तीवर नवी मुंबईत वेगळी परिस्थिती असून, वडाच्या झाडांचे प्रमाण अधिक आहे.