चार्जिंगस्टेशन अभावी एनएमएमटीचा बोजवारा

चार्जिंग स्टेशनअभावी एनएमएमटीचा बोजवारा
ताफ्यात ५० टक्के इलेक्ट्रिक बसेस; केवळ चार ठिकाणी चार्जिंग स्टेशन
तुर्भे, ता. १० (बातमीदार) ः पर्यावरणपूरक वाहतुकीसाठी एनएमएमटीच्या वतीने इलेक्ट्रिक गाड्यांना प्राध्यान्य दिले जात आहे. त्यानुसार इलेक्ट्रिक बस खरेदी करण्याकडे नवी मुंबई महापालिका प्रशासनाचा कल आहे. या बससाठी शहरात २१ ठिकाणी चार्जिंग स्टेशन उभारण्याचा प्रस्ताव तयार करण्यात आला होता, मात्र तो धूळखात पडून आहे. त्यामुळे अपुऱ्या चार्जिंग स्टेशनअभावी चार्जिंगची गैरसोय होत आहे. त्‍यातच चार्जिंगसाठी बराच वेळ लागत असल्याने अन्य गाड्यांतून प्रवाशांना पुढील प्रवास पूर्ण करावा लागत आहे.
सध्या एनएमएमटीच्या ताफ्यात ५० टक्के इलेक्ट्रिक बसेस आहेत, मात्र चार्जिंग स्टेशन फक्त चारच ठिकाणी आहेत. घणसोली, तुर्भे आगाराबरोबर वाशी रेल्वे आणि नेरूळ येथील बसस्थानकात चार्जिंगसाठी स्टेशन उभारण्यात आलेली आहेत. जवळच्या मार्गावर या बसेस चालवताना चार्जिंग संपण्याअगोदर त्‍या आगारात पाठविल्या जातात, मात्र लांब पल्ल्याच्या मार्गावरील बस गाड्यांमध्ये कुठेच चार्जिंग करता येत नसल्याने मोठी अडचण येते. त्‍यामुळे जवळील अंतरावरील गाड्यांना जेमतेम ६० ते ७० टक्केच चार्जिंग केली जाते, तर लांब पल्ल्याच्या गाड्यांना फुल्ल चार्जिंग करण्यात येते.
बस चार्जिंगसाठी शहरात २१ ठिकाणी चार्जिंग स्टेशन उभारली जाणार होती, मात्र हे चार्जिंग स्टेशन उभारण्याचा प्रस्ताव तीन वर्षांपासून धूळखात पडून आहे. त्यामुळे चार्जिंग स्टेशनची उभारणी होऊ शकलेली नाही. आतापर्यंत शहरात केवळ चार चार्जिंग स्टेशन उपलब्ध आहेत. अपुऱ्या चार्जिंग स्टेशन अभावी गाड्यांना चार्जिंग करण्यात अडचण येत आहे. त्यामुळे लांब पल्ल्याच्या गाड्या चार्जिंगअभावी अर्ध्या प्रवासात बंद पडत आहेत.
..................
पनवेल ते ठाण्यासह खारघर ते बोरिवली या मार्गावर ही अडचण येऊ लागली आहे. खारघरवरून निघालेली बस चार्जिंगसाठी तुर्भे आगारात आणावी लागते. त्‍यामुळे चार्जिंगमध्ये बराच वेळ वाया जातो.
एनएमएमटीच्या वतीने शहरात २१ ठिकाणी पॉवरग्रीडच्या सहाय्याने चार्जिंग स्टेशन उभारण्याचा निर्णय चार वर्षांपूर्वी झाला होता, मात्र पॉवरग्रीडकडून अजून हे चार्जिंग स्टेशन उभारण्याचे काम पूर्ण झाले नसल्याने हा विषय मागे पडला आहे. त्यानंतर महापालिकेने स्वतः चार्जिंग स्टेशन उभारण्याच्या हालचाली सुरू केल्या होत्या, मात्र त्याचे अजूनही काही झालेले नाही. सध्या पनवेलमधील आसुडगाव आगारात चार्जिंग स्टेशन उभारण्याचे काम हाती घेण्यात आल्याचे एनएमएमटीच्या सूत्रांनी सांगितले आहे. याबाबत परिवहन व्यवस्थापक योगेश कडूस्कर यांच्याशी वारंवार संपर्क साधला, पण त्यांनी कोणताही प्रतिसाद दिला नाही.