क्लस्टर योजनेचा मार्ग मोकळा : मोहन उगले

क्लस्टर योजनेचा मार्ग मोकळा : मोहन उगले

कल्याण, ता. ११ (वार्ताहर) : ठाण्याच्या धर्तीवर कल्याणमध्येदेखील क्लस्टर योजनेचा मार्ग मोकळा झाला आहे. याबाबत खासदार डॉ. श्रीकांत शिंदे यांच्या अध्यक्षतेखाली ठाण्यात नुकतीच बैठक झाली. कल्याणचा विकास, रस्ते, इमारती, क्लस्टर योजना याबाबत बैठकीत चर्चा झाली. क्लस्टर योजनेमुळे शहराचा विकास होईल, तसेच गरिबातील गरीब नागरिकांना हक्काचे ३२५ स्क्वेवर फूट क्षेत्रफळाचे घर मिळेल, असे उगले यांनी सांगितले.

ठाणे शहरात क्लस्टर योजनेला मान्यता दिल्यानंतर कल्याण-डोंबिवली शहरातदेखील क्लस्टर योजनेला मंजुरी देण्याची मागणी करण्यात आली होती. अखेर सरकारने डिसेंबरमध्ये प्रसिद्ध केलेल्या डीसीरूलमध्ये कल्याण-डोंबिवलीसह आजूबाजूच्या शहरात क्लस्टर योजना राबविण्यास सरकारने मंजुरी दिली आहे. कल्याण-डोंबिवली महापालिका हद्दीत वेगाने वाढणारी वाहतूक आणि नागरीकरणाच्या पार्श्वभूमीवर रस्ता रुंदीकरण आणि मैदाने, बगिचा यांसारख्या सुविधा पुरविणे आवश्यक आहे; मात्र जागेअभावी या विकासकामांत अडथळे निर्माण होत होते.

शहरातील अनेक इमारती जीर्ण, धोकादायक बनल्या आहेत; मात्र या इमारतीच्या पुनर्विकासाचा प्रश्न रखडला होता. या इमारतीचा क्लस्टर योजनेतून विकास शक्य असल्यामुळे शहरात क्लस्टर योजना लागू करावी, अशी मागणी केली जात होती. अखेर राज्य सरकारने कल्याण-डोंबिवली महापालिकेचादेखील क्लस्टर योजनेत समावेश केल्याचे जाहीर केले आहे. या योजनेतून १० हजार मीटर भूखंड असलेल्या जुन्या अधिकृत किंवा अनधिकृत इमारती किंवा चाळी एकत्र येत या भूखंडावर अधिकृत इमारत उभारणे शक्य होईल. या इमारतीसाठी चार एफएसआय वापरता येऊ शकेल. या बैठकीला आमदार विश्वनाथ भोईर, आमदार राजेश मोरे, केडीएमसी आयुक्त अभिनव गोयल, नगररचनाकार संतोष डोईफोडे, माजी महापौर वैजयंती गुजर घोलप, शिवसेना जिल्हाप्रमुख अरविंद मोरे, शहरप्रमुख नीलेश शिंदे, माजी नगरसेवक मोहन उगले, विद्याधर भोईर, मल्लेश शेट्टी, रमेश म्हात्रे, जनार्दन म्हात्रे आदी पदाधिकारी उपस्थित होते.

अधिकृत घरात राहण्याची संधी
१० हजार चौरस मीटरच्या भूखंडावर डीपी रस्त्यासाठी जागा, बगिचा, मैदाने यासाठी आवश्यक भूखंड राखीव ठेवत तितका एफएसआय इमारतीसाठी वापरता येणार आहे. अग्निशमन विभागाकडून जितक्या मजल्याची इमारत उभारण्याची परवानगी दिली जाईल, तितक्या मजल्याची इमारत उभारता येणार असल्याने धोकादायक इमारतीत जीव मुठीत घेऊन राहणाऱ्या नागरिकांना अधिकृत घरात राहण्याची संधी मिळणार आहे, असे उगले यांनी सांगितले.