जाहिरात फलकांची झाडाझडती

सकाळ वृत्तसेवा
ठाणे, ता. ११ : पावसाळ्यात सोसाट्याच्या वाऱ्यामुळे होर्डिंग कोसळून दुर्घटना होऊ नये, यासाठी पालिका प्रशासनाकडून पालिका क्षेत्रातील होर्डिंग कंपन्यांच्या मालकांना होर्डिंग स्थिरता प्रमाणपत्र सादर करण्याच्या सूचना केल्या होत्या. त्यानुसार १९५ होर्डिंगधारकांपैकी १३९ होर्डिंग कंपन्यांनी फलकाच्या लोखंडी सांगाड्याचे स्थिरता प्रमाणपत्र सादर केले. तसेच उर्वरित ५६ कंपन्यांनी अद्यापही प्रमाणपत्र सादर केले नसल्याने महापालिका कारवाईचा बडगा उचलणार आहे.
मुंबईतील घाटकोपर येथे सोसाट्याच्या वाऱ्यासह कोसळणाऱ्या पावसामुळे मोठे होर्डिंग कोसळून दुर्घटना झाली होती. या घटनेनंतर मुंबईसह ठाणे पालिका सतर्क झाली आहे. त्यानुसार यंदा पावसाळ्यात अशा प्रकारची घटना घडू नये, यासाठीची खबरदारी घेण्यात आली आहे. त्यानुसार होर्डिंगच्या लोखंडी सांगाड्याचे स्थिरता प्रमाणपत्र सादर करण्याचे आदेश पालिकेने दिले आहेत. यामध्ये शहरातील प्रमुख रस्ते, महामार्ग आणि चौकातील जाहिरात फलकांचा समावेश आहे. याच अनुषंगाने प्रशासनाने २५ मेपर्यंत फलकांच्या सांगाड्याचे स्थिरता प्रमाणपत्र सादर करण्यास सांगितले होते. यानंतर १९५ जाहिरात फलकांपैकी १३९ होर्डिंग कंपन्यांनी फलकांचे स्थिरता प्रमाणपत्र सादर केले. तर उर्वरित ५६ जाहिरात फलक कंपन्यांनी अद्यापही स्थिरता प्रमाणपत्र सादर केले नसल्याने पालिका प्रशासन अशा जाहिरातधारकांवर कारवाईचा बडगा उगारणार आहे.
------------------------------
सोमवारपासून कारवाई
पालिकेने स्थिरता प्रमाणपत्र सादर करण्याच्या सूचना दिल्यानंतरही ५६ होर्डिंग कंपन्यांनी अद्यापही स्थिरता प्रमाणपत्र सादर केले नाही. अशा होर्डिंग कंपन्यांविरोधात पालिकेने सोमवारपासून कारवाईचा बडगा उगारला आहे. तसेच ज्या जाहिरात होर्डिंग कंपन्यांकडून स्थिरता प्रमाणपत्र सादर केले जाणार नाही, त्या होर्डिंगवरील जाहिरात काढून टाकण्यात येणार असल्याचे ठाणे पालिका सहाय्यक आयुक्त दशरथ वाघमारे यांनी सांगितले.