थकीत अनुदानासाठी कापड उद्योजकांचे आमदारांना साकडे

बोईसर, ता. ११ (बातमीदार) : बोईसर-तारापूर एमआयडीसीमधील वस्त्रोद्योगांची अनुदान शासनस्तरावर पाठपुरावा करून मिळवून देऊ, अशी ग्वाही आमदार विलास तरे यांनी टीमा हॉल येथे झालेल्या बैठकीत दिली.

बोईसर-तारापूर औद्योगिक क्षेत्रामधील कापड उद्योग सध्या अनेक कारणांमुळे अडचणीत आहे. त्यांचे प्रश्न सोडवण्यासंदर्भात आमदार विलास तरे यांच्या अध्यक्षतेखाली बोईसर येथे कापड उद्योजक आणि संबंधित अधिकारी यांची सोमवारी (ता. ९) बैठक आयोजित करण्यात आली होती. या बैठकीत राज्य सरकारकडे असलेले थकीत अनुदान त्वरित मिळावे, अशी मागणी करण्यात आली. यावर आपण प्रयत्न करणार असल्याचे आश्वासन आमदार तरे यांनी दिले.

तारापूर औद्योगिक क्षेत्रामध्ये सुमारे १,२०० कारखाने कार्यरत असून ५० पेक्षा अधिक कापड उद्योग सुरू आहेत. गेल्या काही वर्षांपासून त्यांना अनेक समस्यांचा सामना करावा लागत आहे. टीमाचे डी. के. राऊत म्हणाले, की कर्मचारी राज्य विमा महामंडळाला (ईएसआयसी) एमआयडीसीमधून दरमहा सहा कोटी रुपये दिले जातात. त्या अनुषंगाने येथील कामगारांना उत्तम आरोग्य सेवा मिळावी म्हणून ईएसआयसीचे रुग्णालय तातडीने उभारावे, अशी मागणी आहे. तसेच, एमआयडीसीमधून निघणाऱ्या घातक पाण्याची क्षमता फक्त २५० सीओडी आहे, ती गुजरातप्रमाणे ५०० सीओडी करावी, अशी मागणी करण्यात आली. यावर आमदार तरे म्हणाले, की आम्ही पावसाळी अधिवेशनामध्ये हा प्रश्न उपस्थित करणार असून यावर तातडीने पाठपुरावा केला जाईल.