कल्याणमध्ये अघोषित पाणीबाणी

कल्याणमध्ये अघोषित पाणीबाणी
जलवाहिनी फुटल्याने टँकरने पुरवठा; तीन दिवसांत ५०० हून अधिक टँकर विकले

कल्याण, ता. १२ : मोहम्मद अली चौकाजवळ कल्याण पश्चिम परिसरात पाणीपुरवठा करणारी मुख्य जलवाहिनी रविवारी (ता. ८) फुटली होती. काँक्रीटच्या रस्त्याखालून जाणारी जलवाहिनी दुरुस्त करण्यासाठी महापालिकेला तीन दिवसांचा कालावधी लागला. बुधवारी (ता. ११) पाणीपुरवठा सुरू करण्यात आला; मात्र या कालावधीत पाणीपुरवठा ठप्प झाल्याने टँकरचा धंदा तेजीत झाला. या तीन दिवसांत केडीएमसीचे तब्बल ५०० हून अधिक पाण्याचे टँकर विकले गेले. तर अघोषित पाणीबाणीचा खासगी टँकरमालकांनी फायदा घेत तब्बल दीड हजार रुपयांना एक टँकर विकला. यामुळे पालिकेच्या निष्काळजीचा तीन दिवसांत नागरिकाच्या खिशाला फटका बसला.

कल्याण मोहम्मद अली चौकात असलेली मुख्य जलवाहिनी रविवारी सकाळी फुटली. या घटनेनंतर नागरिकांनी तातडीने महापालिकेकडे तक्रारी केल्या. केडीएमसीकडून रात्री उशिरा पाणीपुरवठा बंद करण्यात आला. त्यानंतर जलवाहिनीची शोधमोहीम सुरू झाली. काँक्रीट रस्त्याखालून गेलेल्या जलवाहिनीमुळे अधिकाऱ्यांना शोध घेण्यात अडचणी आल्या. चार-पाच फूट खोल रस्ता फोडल्यावर अखेर फुटलेली जलवाहिनी सापडली. ही जलवाहिनी बारावे जलशुद्धीकरण केंद्राशी जोडलेली आहे, त्यामुळे सोमवारपासून तीन दिवस संपूर्ण पाणीपुरवठा बंद राहिला. याचा कल्याण-डोंबिवलीतील नागरिकांना प्रचंड त्रास सहन करावा लागला.

तीन दिवसांत पालिकेने तब्बल ५०० पेक्षा अधिक टँकर विकले, अशी माहिती कर्मचाऱ्यांनी दिली. त्यामुळे करदात्यांना सेवा न देता पालिका कमाईच्या मागे लागल्याचा आरोप नागरिकांकडून होत आहे. यासंदर्भात संपर्क साधण्याचा प्रयत्न केला असता पाणीपुरवठा अधिकाऱ्यांनी फोन बंद ठेवला, तर इतर अधिकाऱ्यांनी केवळ ‘जलवाहिनी दुरुस्ती झाली असून, काही भागात पाणीपुरवठा सुरू आहे’, असे सांगून विषय टाळला.

पाण्यासाठी लांबच लांब रांगा
जलवाहिनी फुटल्याने पाणीटंचाई निर्माण झाल्याने नागरिकांनी पाण्याच्या टँकरसाठी नंबर लावले. केडीएमसीकडून ४०० रुपयांना टँकर विक्री सुरू झाली, तर खासगी टँकरचालकांनी याच संधीचा फायदा घेत १००० ते १५०० रुपयांपर्यंत दर वाढवले. नागरिक रात्री ३ वाजता टँकरसमोर रांगा लावून पाणी भरताना दिसले.