पदभरतीच्या आदेशांना अखेर स्थगिती

टोकावडे, ता. १२ (बातमीदार)ः मुरबाड तालुक्यातील एकात्मिक बालविकास सेवा योजना प्रकल्पांतर्गत ग्रामपंचायत सिंगापूर कार्यक्षेत्रातील कोळेवाडी गावातील अंगणवाडी सेविकेच्या रिक्त जागेसाठी पदभरती प्रक्रियेला स्थगिती देण्यात आली आहे. सिंगापूर ग्रामपंचायत हद्दीतील स्थानिक आदिवासी महिला उमेदवारांना डावलण्यात आल्याच्या तक्रारीनंतर जिल्हा परिषदेने हा निर्णय घेतला आहे.
मुरबाड येथील एकात्मिक बालविकास प्रकल्प अधिकाऱ्यांनी मनमानी करीत अपात्र उमेदवारांची निवड केली होती. याबाबत सिंगापूर ग्रामपंचायतीचे सरपंच देवराम वाघ यांनी ठाणे जिल्हा परिषदेचे मुख्य कार्यकारी अधिकारी रोहन घुगे यांच्याकडे केली होती. तसेच ‘सकाळ’ वृत्तपत्रात ‘अंगणवाडी भरती प्रक्रिया वादात’ या मथळ्याखाली ६ जून रोजी वृत्त प्रसिद्ध झाले होते. या बातमीची दखल घेत जिल्हा परिषद कार्यालयाकडून भरती निवडीचे आदेश रद्द करण्यात आले आहेत. याबाबतचे लेखी पत्र एकात्मिक बालविकास सेवा प्रकल्प अधिकारी मुरबाड २ (टोकावडे) अपर्णा विशे यांनी प्रसिद्ध केले आहे. त्यामुळे स्थानिक महसूल गावातील उमेदवाराचा भरतीचा मार्ग मोकळा झाला आहे.
..................
एकात्मिक बालविकास प्रकल्प अधिकारी मुरबाड २ (टोकावडे) यांनी ग्रामपंचायत सिंगापूर (कोळेवाडी) येथील नियमबाह्य भरती उमेदवाराच्या विरुद्ध जिल्हा परिषदेकडे तक्रार केल्यानंतर भरती आदेश रद्द करण्यात आले आहेत. त्यामुळे प्रतीक्षा यादीतील उमेदवारांना पात्र करावे.
- देवराम वाघ, सरपंच, सिंगापूर ग्रामपंचायत