ठाकरे बंधूंच्या ऐक्यासाठी हाक

भिवंडी, ता. १२ (वार्ताहर)ः महाराष्ट्राच्या राजकीय पटलावर ठाकरे बंधूंच्या एकत्र येण्याची चर्चा आहे. स्थानिक स्वराज्य संस्थांच्या निवडणुकीच्या निमित्ताने दोन्ही भावांनी एकत्र यावे, अशी अपेक्षा दोन्ही पक्षाच्या कार्यकर्त्यांमधून सुरू आहे. त्यामुळे आदित्य ठाकरे आणि राज ठाकरे यांच्या वाढदिवसाचे निमित्त साधताना मुंबई-नाशिक महामार्गावरील लावलेले बॅनर लक्ष वेधून घेत आहेत.
महाराष्ट्राच्या राजकारणात ठाकरे हे नाव नेहमीच ब्रँड म्हणून राहिले आहे. मराठी अस्मितेचा धागा हो, असे आवाहन उद्धव ठाकरे यांनी केले आहे. जेथे प्रजा तेथे राजा, प्रजेने आवाज दिला आहे, आम्हाला खात्री आहे ठाकरे बंधूंचे ऐक्य होणार, असा विश्वास साईनाथ तारे यांनी व्यक्त केला आहे. सत्तापिपासूंकडून महाराष्ट्र लुटला जात आहे. मराठी अस्मितेवर घाला घातला जात आहे. अशा वेळी मराठी माणूस म्हणून शिवसेना व मनसेचे कार्यकर्ते आपापल्या नेत्यांकडे बैठका करून आपापसातील मतभेद दूर करण्याचा प्रयत्न करीत आहेत. त्यामुळे दोन्ही पक्षातील कार्यकर्त्यांनी एकत्र लढण्याची गरज असल्याची महाराष्ट्रातील लोकांची भावना असल्याचे शिवसेना ठाकरे गटाचे ठाणे जिल्हा ग्रामीण संपर्कप्रमुख साईनाथ तारे यांनी सांगितले.