पालिकेच्या खासगीकरण धोरणाला विरोध

पालिकेच्या खासगीकरण धोरणाला विरोध
कामगार संघर्ष समितीच्या मेळाव्यात निर्णायक लढ्याचा निर्धार
मुलुंड, ता. १२ (बातमीदार) ः मुंबई महापालिकेच्या घनकचरा व्यवस्थापन आणि परिवहन विभागातील कायमस्वरूपी कामगारांची कामे खासगी कंत्राटदारांमार्फत कंत्राटी पद्धतीने करवून घेण्यासाठी पालिकेने काढलेल्या निविदांचा निषेध नोंदवण्यासाठी पालिका कामगार संघटना संघर्ष समितीच्या वतीने बुधवारी (ता. ११) दादरच्या शिवाजी मंदिर नाट्यगृह येथे भव्य मेळाव्याचे आयोजन केले होते.
पालिकेच्या ‘एरिया बेस’ पद्धतीवर आधारित खासगीकरणाच्या निर्णयाला विरोध करण्यासाठी आणि १४ मे २०२५ रोजी प्रसिद्ध करण्यात आलेल्या संबंधित निविदा थांबवण्यासाठी विविध कामगार संघटनांनी एकत्र येत स्थापन केलेल्या संघर्ष समितीने हे आंदोलन छेडले. मेळाव्याचे अध्यक्षस्थान म्युनिसिपल मजदूर युनियनचे अध्यक्ष अशोक जाधव यांनी भूषविले. हजारो कामगार व कर्मचाऱ्यांनी मेळाव्याला उत्स्फूर्त प्रतिसाद दिला.
या मेळाव्यात संघर्ष समितीच्या माध्यमातून विविध प्रमुख कामगार नेत्यांनी मार्गदर्शनपर भाषणे दिली. यामध्ये म्युनिसिपल मजदूर युनियनचे सरचिटणीस वामन कविस्कर आणि कार्याध्यक्ष यशवंतराव देसाई, म्युनिसिपल कर्मचारी कामगार सेनेचे अध्यक्ष बाबा कदम, सरचिटणीस सत्यवान जावकर, उपाध्यक्ष संजय कांबळे-बापेरकर व संजय वाघ, मुंबई म्युनिसिपल कामगार संघाचे कार्याध्यक्ष शेषराव राठोड व सरचिटणीस संजीवन पवार, द म्युनिसिपल युनियनचे सरचिटणीस रमाकांत बने, कार्याध्यक्ष सुनील शिंदे, उपाध्यक्ष रंगनाथ सातवसे व नरेश चौहाण, म्युनिसिपल मजदूर संघाचे सरचिटणीस प्रकाश जाधव, कचरा वाहतूक श्रमिक संघाचे अध्यक्ष अ‍ॅड. दीपक भालेराव, सरचिटणीस मिलिंद रानडे आणि शशांक राव यांचा समावेश होता.

मेळाव्यात सर्वच संघटनांनी एकमुखाने पालिका प्रशासनाच्या खासगीकरणाच्या धोरणावर नाराजी व्यक्त केली. एकतर्फी निर्णय घेऊन कामगारांच्या हक्कांवर गदा आणणाऱ्या या निर्णयाचा तीव्र निषेध व्यक्त करत, लढ्यासाठी संपूर्णपणे सज्ज असल्याची ग्वाही सर्व नेत्यांनी दिली. आंदोलनात एकी राखून हे टेंडर रद्द करण्यासाठी सर्वतोपरी संघर्ष केला जाईल, असे स्पष्ट करण्यात आले.

तर आझाद मैदानात आंदोलन
कामगारांच्या मनात निर्माण झालेल्या असंतोषाच्या पार्श्वभूमीवर संघर्ष समितीने निर्णय घेतला की, आयुक्तांना तत्काळ निवेदन पाठवून ही भावना स्पष्ट केली जाईल. तसेच सफाई व परिवहन विभागातील खासगीकरणाविषयी काढलेल्या निविदा तातडीने रद्द करण्याची मागणी करण्यात आली. १६ जून २०२५ पर्यंत निविदा मागे न घेतल्‍यास १७ जून रोजी आझाद मैदानात तीव्र आंदोलन छेडले जाईल, असा इशारा या वेळी देण्यात आला.