बेकायदा शाळा रडारवर

भिवंडी, ता. १२ (बातमीदार) : भिवंडी महापालिका क्षेत्रात १८ बेकायदेशीर शाळांव्यतिरिक्त पाच अनधिकृत शाळांची यादी नुकतीच प्रसिद्ध करण्यात आली होता. या शाळांवर १५ दिवसांत कारवाई करण्याची मागणी होत आहे. याच अनुषंगाने महापालिका प्रशासनाने अशा शाळांचे पाणी तसेच वीजपुरवठा खंडित करण्याचे आदेश संबंधित विभागांना दिले आहेत.
महापालिका प्रशासनाने काही महिन्यांपूर्वी शहरातील १८ बेकायदेशीर शाळांची यादी जाहीर केली होती. त्यामध्ये ब्राइट ज्युनियर कॉलेज, कल्याण रोड, व्हिक्टोरियन इंग्लिश स्कूल, गणेश सोसायटी, न्यू एरा इंग्लिश स्कूलची सेकंड ब्रांच, भारत कंपाउंड, एम. एम. पब्लिक स्कूल, भारत कंपाउंड, विवेकानंद इंग्लिश स्कूल, टेमघर येथील शाळांचा समावेश आहे. या शाळांमुळे सरकारी शाळा बंद होत आहेत. तसेच अशा शाळांवर कारवाई होत नसल्याने प्रवेश घेतल्याने अनेक विद्यार्थ्यांची फसवणूक होत आहे. त्यामुळे अशा अनधिकृत शाळेचे मुख्याध्यापक आणि शाळा संचालकांवर फौजदारी गुन्हे दाखल करून दंडात्मक कारवाई करावी. तसेच दोन दिवसांत ठोस पाऊल उचलले नाही, तर पीपल्स रिपब्लिकन पार्टी मायनॉरिटी विभागामार्फत निदर्शने करण्यात येतील, असा इशारा भिवंडी शहर अध्यक्ष अब्दुल गनी खान यांनी दिला आहे.
------------------------------
राजकीय दबावावर प्रश्नचिन्ह
राजकीय दबाव किंवा हितसंबंधामुळे शिक्षण विभागाने शहरात बेकायदेशीरपणे चालणाऱ्या अर्धा डझनहून अधिक बेकायदेशीर शाळांची नावे यादीत समाविष्ट केलेली नाहीत. तसेच निवेदनात महापालिकेच्या यादीत समाविष्ट नसलेल्या पाच बेकायदेशीर शाळांची यादीदेखील जोडली आहे. त्यामुळे राज्य शिक्षण मंडळ आणि पालिकेच्या शिक्षण विभागाने बेकायदेशीर शाळांवर तत्काळ कारवाई करावी, अशी मागणी केली आहे.
़़़़़़़ः----------------------------------------
महापालिकेने बेकायदा घोषित केलेल्या शाळांचे पाणी, वीजपुरवठा तोडण्याचे आदेश देण्यात आले आहेत. दोन दिवसांत अशा शाळांबाहेर शाळा अनधिकृत असल्याचे बॅनर लावले जाईल. ज्यामध्ये पालकांना त्यांच्या मुलांना बेकायदेशीर शाळांमध्ये प्रवेश देऊ नये, अशी विनंती केली जाईल.
- बाळकृष्ण क्षीरसागर, उपायुक्त, शिक्षण विभाग, भिवंडी