‘कामवारी’ला जलपर्णीचा विळखा

भिवंडी, ता. १२ (वार्ताहर)ः तालुक्याच्या ग्रामीण भागातून वाहणाऱ्या कामवारी नदीपात्रात जलपर्णीचा विळखा पडला आहे. या प्रकारामुळे नदीतील जलचरांचे अस्तित्व धोक्यात आले असून, परिसरातील सांडपाण्यामुळे ही परिस्थिती उद्भवल्याचा आरोप पर्यावरणप्रेमींनी केला आहे.
कवाड नजीकच्या देपिवली गावाच्या कुशीत उगम पावणारी कामवारी नदी ग्रामीण भागातून ३२ किलोमीटरचा प्रवास करीत भिवंडी महापालिकेच्या सीमेवरून वाहत पुढे वसई खाडीत विसावते, पण या नदीलगतच्या शेलार ग्रामपंचायत हद्दीतील सायझिंग डाईंगचे प्रक्रिया केलेले केमिकलयुक्त पाणी, शहरातील मलनिस्सारण प्रकल्पातील सांडपाणी थेट पात्रात सोडले जात असल्याने प्रदूषणाच्या विळख्यात अडकलेल्या नदीतील जलचर नामशेष होण्याच्या मार्गावर आहेत, तर शासनाच्या नदी पुनर्जीवन प्रकल्पाअंतर्गत कामवारी नदींचा समावेश आहे, परंतु नदीच्या दुरवस्थेकडे जिल्हा प्रशासन, प्रदूषण नियंत्रण महामंडळ, भिवंडी महापालिका दुर्लक्ष करत असल्याने नदीला जलपर्णीचा विळखा पडला आहे.