जिल्हाधिकारी कार्यालयावर ठिय्या आंदोलन

पालघर, ता. १२ (बातमीदार) : जिल्हा परिषद अनुदानित आश्रमशाळांमधील विद्यार्थ्यांना माध्यान्ह वेळेत देण्यात येणारा शालेय पोषण आहार शिजवण्याचे कंत्राट एका खासगी कंपनीला देण्याचा घाट पालघर जिल्हा परिषदेने घेतला आहे; मात्र यामुळे स्थानिक कर्मचारी बेरोजगार होण्याची भीती निर्माण झाली आहे. विद्यार्थ्यांना ताजा आहार मिळणे आवश्यक आहे, म्हणून खासगी कंपनीला कंत्राट देऊ नये, या मागणीकरिता महाराष्ट्र राज्य शालेय पोषण आहार कर्मचारी संघटनेच्या वतीने आज (ता. १२) पालघर जिल्हाधिकारी कार्यालय येथे ठिय्या आंदोलन करण्यात आले.

आतापर्यंत शालेय पोषण आहार स्थानिक पातळीवरील बचत गटाला शालेय पोषण आहार शिजवण्याचे कंत्राट दिले जात असे. पोषण आहार विद्यार्थ्यांना सकस आणि ताजा मिळावा तसेच स्थानिक गरजू महिलांना रोजगार मिळावा, असा शासन निर्णय आहे. मात्र पालघर जिल्हा परिषदेने हे कंत्राट एका मोठ्या खासगी कंपनीला देण्याची नोटीस काढली आहे. त्यामुळे जव्हार, मोखाडा, विक्रमगड या भागातील पोषण आहार शिजवणाऱ्या जवळपास तीन हजार महिलांनी आमदार विनोद निकोले यांच्या उपस्थितीत जिल्हाधिकारी कार्यालय येथे मोर्चा काढून ठिय्या आंदोलन केले. तसेच आमदार निकोले आणि शालेय पोषण आहार कर्मचारी संघटनेच्या वतीने निवासी उपजिल्हाधिकारी सुभाष बागडे यांना पत्र देण्यात आले.