परप्रांतीय रिक्षाचालकाने घातली ठाणे वाहतूक पोलीस उपायुक्तांवर रिक्षा

पोलिस उपायुक्तांच्या अंगावर घातली रिक्षा
उपायुक्तांना दुखापत ः रिक्षाचालकाला २४ तासांनी अटक
सकाळ वृत्तसेवा
ठाणे, ता. १३ : ठाणे शहर वाहतूक विभागाचे पोलिस उपायुक्त पंकज शिरसाट यांच्या अंगावर एका परप्रांतीय रिक्षाचालकाने रिक्षा घातल्याची घटना समोर आली आहे. या घटनेत शिरसाट जखमी झाले आहेत. वागळे इस्टेट साठेनगर येथील रिक्षाचालक हेमंत संतोष वर्मा (वय २७) याच्याविरोधात जीवे मारण्याचा प्रयत्न केल्याप्रकरणी गुन्हा दाखल केला असून त्याला गुरुवारी (ता. १२) अटक केल्याची माहिती चितळसर पोलिसांनी दिली.
मानपाडा येथील एमजी हेक्टर शोरूमसमोरील ठाण्याकडून घोडबंदरकडे जाणाऱ्या रस्त्यावर वाहतूक पोलिस उपायुक्त शिरसाट बुधवारी (ता. ११) रात्री वाहतुकीचे नियमन करीत होते. याच दरम्यान रिक्षाचालक हेमंत याने वाहतूक सूचनांकडे दुर्लक्ष करीत बेदरकार शिरसाट यांच्या अंगावर रिक्षा घातली. यामध्ये त्यांच्या खांद्याला गंभीर दुखापत झाली असून त्यांना उपचारार्थ रुग्णालयात दाखल केले आहे. याप्रकरणी चितळसर पोलिस ठाण्यात गुन्हा दाखल करून रिक्षाचालक हेमंत वर्माला अटक केली.
हेमंतला शुक्रवारी (ता. १३) ठाणे न्यायालयात हजर केले असता १५ जूनपर्यंत पोलिस कोठडीत सुनावली असल्याची माहिती वरिष्ठ पोलिस निरीक्षक सुनील वरूडे यांनी दिली. याप्रकरणी पुढील तपास पोलिस उपनिरीक्षक प्रशांत सांगळे करीत आहेत.

(फोटो ः जखमी पोलिस उपायुक्त पंकज शिरसाट)