वासिंद पोलिस ठाण्याचे सुशोभीकरण

किन्हवली, ता.१५(बातमीदार)ः मुख्यमंत्री देवेंद्र फडणवीस यांच्या संकल्पनेतील सातकलमी कृती आराखडा कार्यक्रमाच्या मिशन १०० दिवस अभियानातून वासिंद पोलिस ठाण्याचे रूपडे पालटले आहे. पोलिस निरीक्षक हर्षवर्धन बारवे यांच्या पुढाकारातून तसेच लोकसहभागातून पोलिस ठाण्यात अद्ययावत सुविधा दिल्या गेल्या आहेत.
मध्य रेल्वेच्या कल्याण-कसारा लोहमार्गावरील महत्त्वाचे स्थानक असलेल्या वासिंदचा झपाट्याने विकास होत आहे. अनेक शासकीय, निमशासकीय आस्थापनांची कार्यालये असलेल्या गावातील पोलिस ठाण्याची इमारत जीर्ण झाली होती. त्यामुळे सातकलमी कृती आराखडा कार्यक्रमाच्या मिशन १०० दिवस अभियानातून ठाणे ग्रामीण पोलिस अधीक्षक डॉ.डी.एस.स्वामी यांच्या संकल्पनेतून तसेच शहापूर पोलिस उपविभागीय अधिकारी मिलिंद शिंदे यांच्या मार्गदर्शनाखाली लोकसहभागातून या इमारतीचे नूतनीकरण करण्यात आले आहे. या इमारतीत दर्शनी भागात महाराष्ट्र लोकसेवा हक्क अध्यादेश व कायदेविषयक माहितीपर फलक लावले आहेत. तसेच व्यापारी मंडळाचे सहकार्यातून सीसीटीव्ही कॅमेरे बसविले गेले आहेत. याचबरोबर अभ्यागत कक्ष, गोपनीय, महिला, प्रतिबंधक, प्रभारी अधिकारी, वायरलेस, शस्त्रागार, जनरल ड्युटी अंमलदार, लेखनिक कक्ष तयार केले आहेत.