जिल्ह्यात प्रवेशोत्सवाची जय्यत तयारी

अलिबाग, ता. १४ (वार्ताहर) : नवीन शैक्षणिक वर्ष सोमवारपासून (ता. १६) सुरू होत असून, शिक्षण विभागाची जय्यत तयारी सुरू आहे. रायगड जिल्ह्यात जिल्हा परिषद तसेच अनुदानित शाळांतील विद्यार्थ्यांना राज्य सरकारकडून पाठ्यपुस्तके देण्यात येतात. ही पाठ्यपुस्तके पहिल्याच दिवशी मिळतील, असे नियोजन करण्यात येत आहे. जिल्हा परिषदेच्या विविध शाळांमध्ये स्वच्छता, रंगरंगोटी, वर्गांची सजावट करण्यात येत आहे.
शाळेच्या पहिल्या दिवशी प्रवेशोत्सव राबविण्यात येणार असून, शाळांचा परिसर सजविण्यासोबत पहिल्या दिवशी विद्यार्थ्यांचे स्वागत, प्रभातफेरी, पुस्तके तसेच गणवेश वाटप करण्याचे नियोजन करण्यात येत आहे. त्याचबरोबर एकही बालक शाळाबाह्य राहणार नाही याची काळजी घेतली जात असल्याची माहिती जिल्हा परिषदेच्या मुख्य कार्यकारी अधिकारी नेहा भोसले व प्राथमिक शिक्षण अधिकारी पुनिता गुरव यांनी दिली. जिल्हा परिषदेच्या शाळांमध्ये शिक्षण घेणाऱ्या विद्यार्थ्यांचे पहिल्याच दिवशी स्वागत करण्यासाठी शाळांना तोरणे बांधून रांगोळ्या काढण्यात येणार आहेत. मुख्याध्यापक, शिक्षक तसेच शाळा व्यवस्थापन समिती सदस्यांमार्फत विद्यार्थ्यांचे स्वागत करण्यात येणार आहे. पहिलीच्या मुलांना पुष्प देऊन त्यांचे स्वागत केले जाणार आहे. गावात, वॉर्डात प्रभातफेरी काढून युवक, गावकरी, ज्येष्ठ नागरिकांना प्रभातफेरीमध्ये सहभागी होण्याची विनंती करण्यात येणार आहे.
-------------------
अधिकारी देणार भेटी
शाळेच्या पहिल्या दिवशी जिल्हस्तरीय अधिकारी व कर्मचा‍ऱ्यांच्या भेटीचे नियोजन करण्यात आले आहे. वर्षभर १०० टक्के उपस्थिती ठेवण्यासाठी करावयाच्या प्रयत्नांची माहिती देणे तसेच एकही विद्यार्थी शाळेबाहेर राहणार नाही, अशी उपस्थितांसह प्रतिज्ञा घेण्यात येणार असल्याची माहिती प्राथमिक शिक्षण विभागाने दिली आहे.