घराच्या प्रलोभनातून १९ लाखाला गंडा

घराच्या प्रलोभनातून १९ लाखाला गंडा
सकाळ वृत्तसेवा
डोंबिवली, ता. १४ : मुंबईतील प्रभादेवी परिसरात म्हाडाचे घर मिळवून देतो, असे सांगत चार जणांनी डोंबिवलीमधील एका ३२ वर्षीय व्यक्तीला १९ लाख ६८ हजार रुपयांचा गंडा घातल्याची घटना उघडकीस आली आहे. याप्रकरणी रामनगर पोलिस ठाण्यात गुरुवारी (ता. १२) फसवणूक झालेल्या व्यक्तीने तक्रार दाखल केली असून, पोलिसांनी चौघांविरोधात गुन्हा दाखल करीत तपास सुरू केला आहे.

डोंबिवली पूर्वेतील न्यू आयरे रोड परिसरात राहणारे प्रसाद सुरेश सामंत असे तक्रारदाराचे नाव आहे. डिसेंबर २०२० ते एप्रिल २०२४ या कालावधीत हा फसवणुकीचा प्रकार घडला आहे. फसवणूक करणाऱ्या व्यक्तींनी आपणास मुंबईत प्रभादेवी भागात म्हाडाचे घर मिळवून देतो, असे सांगत विश्वास संपादन केला. मुंबईत म्हाडाचे घर मिळते म्हणून त्यांनी दिलेल्या बँक खात्यावर ऑनलाईन माध्यमातून त्यांच्या मागणीप्रमाणे डिसेंबर २० ते एप्रिल २४ या कालावधीत टप्प्याटप्प्याने १९ लाख ६८ हजार रुपये घराची रक्कम भरणा केली. घराचा ताबा कधी मिळणार, अशी विचारणा प्रसाद यांनी सुरू केली. त्या वेळी त्यांना विविध कारणे देऊन उडवाउडवीचे उत्तरे दिली. घर नाही पण आपले मूळ पैसे परत देण्याची मागणी प्रसाद यांनी करूनही त्यांच्याकडून प्रतिसाद आला नाही. त्यामुळे प्रभादेवी येथील दाम्पत्य आणि त्यांच्या तीन साथीदारांनी आपली घरखरेदीच्या माध्यमातून फसवणूक केल्याची खात्री पटल्यावर तक्रारदार सामंत यांनी रामनगर पोलिस ठाण्यात तक्रार केली आहे.