नाल्यातील जलवाहिन्यांमुळे रस्ते होतात जलमय

बदलापूर, ता. १५ (बातमीदार) : शहरात अनेक मोठमोठे नाले आहेत, तर काही बांधकाम व्यावसायिकांनी आणि भूमाफियांनी भर टाकून अरुंद केले आहेत. परिणामी, या नाल्यातील पाणी पावसाळ्यात अनेकदा रस्त्यांवर येते आणि रस्त्यांना नदीचे स्वरूप प्राप्त होते. बदलापूर पूर्वेच्या कर्जत-पुणे या मुख्य महामार्गाशेजारी असलेल्या प्रेशियस हार्मनी या भागातून मोठा नाला वाहतो. या नाल्यातील पाणी दर वर्षी पावसाळ्यात रस्त्यावरून वाहते. त्यामुळे जवळ जवळ २५ ते ३० गृहसंकुलांचा जाण्याचा मार्ग बंद होतो. या नाल्यांमध्ये पावसाच्या पाण्याच्या प्रवाहाला आड येणारी एक मोठी जलवाहिनी आहे. त्यामुळे नाल्यातून पावसाच्या पाण्याचा निचरा होण्यात अडथळे निर्माण होतात.

बदलापूर पूर्वेला गणेश घाट परिसरातील प्रेशियस हार्मनी या गृहसंकुलाबाहेरील परिसरातून वाहणाऱ्या या नाल्यातील पाणी मोठा पाऊस पडल्यास मुख्य रस्त्यावर वाहते. या वेळी अनेकदा रहिवासी आणि शाळकरी विद्यार्थ्यांना दोरी बांधून साचलेल्या पाण्यातून सुटका करावी लागते. रस्त्यावर नदीसदृश्य परिस्थिती निर्माण होते. दुसरीकडे नाल्यातील पाण्याच्या प्रवाहाला अडसर ठरणारी जलवाहिनी स्थलांतरित करून पाण्याचा प्रवाह सुकर करावा, अशी मागणी स्थानिक करत आहेत. दर वर्षी प्रशासनाला पावसाळ्यात हे चित्र दिसत असतानाही त्याकडे गांभीर्याने पाहिले जात नाही. वारंवार मागणी करूनही जलवाहिनीसंदर्भात कोणताच निर्णय घेतला जात नाही. रस्त्यावर नदीसारखे पाणी वाहत असल्याने घरात एखादा माणूस आजारी असेल, तर त्याला रुग्णालयात कसे न्यायचे? असा प्रश्न पडतो. शाळेत जाणाऱ्या मुलांचीही चिंता पालकांना असते. त्यामुळे प्रशासनाने आता तरी यावर कायमस्वरूपी तोडगा काढावा; अन्यथा नाल्यातील या पाण्याच्या प्रवाहामुळे मोठी दुर्घटना होऊन जीवितहानी होण्याची शक्यता नाकारता येत नाही.

अनेक वर्षांपासून रहिवाशांसह मुख्य रस्त्यावरून जाणाऱ्या वाहनचालकांना पावसाळ्यात हा त्रास सहन करावा लागतो. अतिवृष्टी झाली की मुंबई-कर्जत या मुख्य रस्त्याला नदीचे स्वरूप धारण करतो. म्हणून लवकरात लवकर या नाल्यातील पाण्याचा निचरा आणि नाल्याचा प्रवाह कसा सुरळीत करता येईल, यासाठी प्रशासनाने पाऊल उचलणे गरजेचे आहे. अन्यथा गरज पडल्यास रहिवाशांकडून आंदोलन करण्यात येईल.
- गणेश मंजुळा अनंत, रहिवासी

प्रेशियस हार्मनी या भागात लवकरच पाहणी करण्यात येईल. येथील नाल्यात अडसर ठरत असलेली जलवाहिनी वेगळ्या दिशेला फिरवून पाण्याचा प्रवाह सुरळीत करण्यासाठी पालिका प्रशासनाकडून काम करण्यात येईल.
- मारुती गायकवाड, मुख्याधिकारी
कुळगाव बदलापूर नगर परिषद