ज्येष्ठाला लुटण्याच्या प्रयत्नात असलेला भामटा अटकेत

पनवेल, ता. १५ (वार्ताहर) : पोलिस असल्याची बतावणी करून ७१ वर्षीय ज्येष्ठ नागरिकाला लुबाडण्याच्या प्रयत्नात असलेल्या दुकलीपैकी एका भामट्याला ज्येष्ठ नागरिकाने व त्याच्या मुलाने पकडून पोलिसांच्या स्वाधीन केल्याचा प्रकार पनवेलमध्ये घडला आहे. प्रदीप बापूराव पाटील (४०) असे या भामट्याचे नाव असून पनवेल शहर पोलिसांनी त्याला अटक करून पळून गेलेल्या त्याच्या साथीदाराचा शोध सुरू केला आहे.
या प्रकरणातील ज्येष्ठ नागरिक शांताराम गोविंद मोरे (७१) हे खांदा कॉलनीत राहण्यास असून ९ जून रोजी संध्याकाळी सहा वाजता ते फूल बाजारात जाण्यासाठी पनवेल बसस्थानकावर गेले होते. त्या वेळी एक भामटा त्यांचा पाठलाग करीत असल्याचे त्यांच्या लक्षात आले. भामट्याने पोलिस असल्याचे सांगत शांताराम मोरे यांना रस्त्यात अडवले. त्यानंतर त्याने मोरे यांच्यावर चोरीचा संशय घेत त्यांना दमात घेण्याचा प्रयत्न केला. याचदरम्यान भामट्याचा दुसरा साथीदार तेथे आल्यानंतर त्यानेदेखील पोलिसांचा मोठा साहेब असल्याचे सांगून मोरे यांच्याकडील ओळखपत्रे घेतली. त्यानंतर त्यांनी धमकी देऊन त्यांच्याकडे ५० हजारांची मागणी केली. त्या वेळी मोरे यांनी युक्ती लढवत त्यांना रिक्षामधून खांदा कॉलनीतील घराजवळ नेले. तेथे पोहोचल्यावर मोरे यांनी त्यांचा मुलगा संकेत याला बोलावून घेतले. त्या वेळी एक भामटा पळून गेला. त्यामुळे संकेतने दुसरा भामटा प्रदीप पाटील याला ताब्यात घेऊन पोलिसांच्या स्वाधीन केले.