साचणाऱ्या पाण्यावर पालिकेचा उतारा

सकाळ वृत्तसेवा
ठाणे, ता. १६ : सखल भागात साचणाऱ्या पाण्याचा निचरा करण्यासाठी पालिका प्रशासनाने विशेष उपाययोजना केल्या आहेत. याच अनुषंगाने वंदना टॉकीजजवळ आठ बाय आठ आणि दहा फूट खोल खड्डा तयार करण्यात आला असून पाण्याचा उपसा करण्यासाठी २५ एचपीचा पंप बसवला आहे. त्यामुळे यंदाच्या पावसाळ्यात नागरिकांना दिलासा मिळण्याची शक्यता आहे.
पावसाळ्यात ठाणे महापालिका कार्यक्षेत्रातील १४ सखल भागात पाणी साचते. याशिवाय एकूण ६८ ठिकाणी साचणाऱ्या पाण्याचा निचरा करण्यासाठी महापालिका प्रशासनामार्फत लहान-मोठ्या पंपाची व्यवस्था केली आहे. त्यामध्ये विटावा येथे २५, १५ आणि १० एचपी असे तीन पंप बसवण्यात आले आहेत. तर मार्केटमधील पेढ्या मारुती, चिखलवाडी आणि मासुंदा तलाव येथे १५ एचपी, सिडको, संभाजीनगर आणि दिव्यातील रिव्हर हूड सोसायटी येथे प्रत्येकी १० एचपीचे पंप बसवले आहेत. तसेच काही ठिकाणी पाच एचपीचे पंप बसवले असून सहा पंप राखीव ठेवल्याची माहिती महापालिका सूत्रांनी दिली आहे.
---------------------------------------
वंदना टॉकीजजवळ पाणी साचू नये, म्हणून २५ एचपी पंप बसविण्याचे काम सुरू आहे. तसेच तेथे आठ बाय आठ असा दहा फुटांचा खोल खड्डा तयार करून साचवले पाणी पंपाद्वारे नाल्यात सोडले जाणार आहे.
- यासिन तडवी, अधिकारी, आपत्ती व्यवस्थापन कक्ष, महापालिका