इमारतीच्या आवारात दुर्गंधीयुक्त पाणी

इमारतीच्या आवारात दुर्गंधीयुक्त पाणी
एमआयडीसी निवासी भागातील प्रकार
सकाळ वृत्तसेवा
डोंबिवली, ता. १६ : कल्याण-डोंबिवली शहरात शनिवारी (ता. १४) सायंकाळपासून जोरदार पाऊस सुरू होता. पावसामुळे डोंबिवली एमआयडीसी निवासी भागातील अनेक इमारतीत दुर्गंधीयुक्त पाणी साचले. यामुळे रविवारची सकाळ नागरिकांची घाणीच्या पाण्यात गेली. एमआयडीसी परिसरात रस्त्यांचे काँक्रीटीकरण केले आहे. तसेच नाले, गटारांची बांधणी केली आहे; मात्र हे काम करताना अनेक सोसायट्या या रस्त्यापासून खाली गेल्या आहेत. त्यामुळे रस्ते, गटारातील पाणी हे सोसायट्यांच्या आवारात जमा होत आहे. याचा नागरिकांना मोठा फटका बसत आहे.

डोंबिवली एमआयडीसी निवासी भागात रस्ते, सांडपाणी वाहिन्या, गटारे आणि नाल्यांच्या चुकीच्या नियोजनाचा फटका हा रहिवाशांना बसत आहे. एमआयडीसी प्रशासन तसेच केडीएमसीकडे वारंवार तक्रारी केल्या आहेत; मात्र त्याकडे दुर्लक्ष होत असल्याचा आरोप सामाजिक कार्यकर्ते राजू नलावडे यांनी केला आहे.

शनिवारी सायंकाळी तसेच रात्री एमआयडीसी परिसरात जोरदार पाऊस पडला. निवासीमधील संदेश सोसायटी आणि इतर इमारतीच्या आवारात गुडघाभर पाणी साचले. या पाण्याला घाण, दुर्गंधीयुक्त वास येत असल्याचे येथील रहिवाशांनी सांगितले. पाऊस रात्रभर सुरू राहिला असता तर हेच पाणी तळमजल्यावरील घरात शिरले असते. पावसाळ्याला नुकतीच सुरुवात झाली असून अजून तीन-चार महिने पाऊस पडणार आहे. त्यामुळे या पावसाळ्यात कधीना कधी घरात हे पाणी शिरण्याची शक्यता आहे. एमआयडीसी व केडीएमसी प्रशासनाने याकरिता तातडीने उपाययोजना करावी, अशी मागणी रहिवासी विनिता सावंत यांनी व्यक्त केली आहे.

नागरिक त्रस्त
एमआयडीसीमधील भूमिगत सांडपाणी वाहिन्या आणि त्यावरील चेंबर्स या अनेक ठिकाणी तुंबले आहेत. त्यामुळे त्यातील सांडपाणी उघड्यावर वाहत असते. सांडपाणी वाहिन्या दुरुस्तीचे काम हे एमआयडीसीकडे आहे. तसेच गटारे, नाल्यांची साफसफाई झालेली नाही. गटारे, नाल्यांच्या साफसफाईचे काम केडीएमसीकडे आहे. पावसामुळे गटारातील पाणी इमारतींच्या आवारात येत आहे. नागरिकांनी याबद्दल तक्रारी केल्यानंतर एमआयडीसी आणि केडीएमसी प्रशासन एकमेकांकडे जबाबदारी ढकलत आहे. यामुळे येथील नागरिक त्रस्त आहेत.