दुचाकी, चेन स्नॅचिंग करणारे आरोपी अटकेत

पनवेल, ता. १७ (वार्ताहर) : पनवेल, नवीन पनवेल व खांदेश्वर भागात दुचाकी चोरी, तसेच चेन स्नॅचिंगचे गुन्हे करणाऱ्या दोन आरोपींना खांदेश्वर पोलिसांनी अटक केली आहे. त्यांच्याकडील दोन लाख ३५ हजार किमतीचा मुद्देमाल पोलिसांनी हस्तगत केला आहे.
खांदेश्वर, नवीन पनवेल व पनवेल परिसरात गेल्या काही दिवसांपासून दुचाकी चोरी आणि चेन स्नॅचिंगच्या घटनांमध्ये वाढ झाली होती. त्यानुसार खांदेश्वर पोलिसांनी या गुन्ह्यांचा तपास सुरू केला होता. या तपासात सहाय्यक पोलिस निरीक्षक शरद बरकडे व प्रतापराव बडंगर यांच्या पथकाने वरिष्ठ पोलिस निरीक्षक स्मिता ढाकणे आणि पोलिस निरीक्षक (गुन्हे) सचिन परदेशी यांच्या मार्गदर्शनाखाली पनवेल शहरातील सीसीटीव्ही फुटेजची पडताळणी करून आरोपींचा शोध लावला. पोलिसांनी १२ जूनला रात्रीच्या सुमारास पनवेलमधील पंचशीलनगर झोपडपट्टी परिसरात सापळा रचून आकाश गोपाळ गाडे (२३) व सूरज मारुती देवरे (२२) या दोघांना ताब्यात घेतले. पोलिसांनी या दोघांची सखोल चौकशी केली असता, त्यांनी दुचाकी चोरी व चेन स्नॅचिंगचे गुन्हे केल्याची कबुली दिली. त्यानुसार पोलिसांनी त्यांच्याकडून चोरीच्या तीन दुचाकी व ३० ग्रॅम वजनाच्या दोन सोनसाखळ्या असा दोन लाख ३५ हजारांचा मुद्देमाल हस्तगत केला.