भिवंडीत तीन दिवसात पाच अल्पवयीन बेपत्ता,तीन मुलींचा समावेश

भिवंडीत तीन दिवसांत पाच अल्पवयीन बेपत्ता
तीन मुलींचा समावेश : बालकांच्या अपहरणाच्या घटनेत वाढ
भिवंडी, ता. १७ (वार्ताहर) ः शहरात अल्पवयीन मुलांच्या अपहरणाच्या घटना मोठ्या प्रमाणात होत आहेत. तीन दिवसांत शहरातून पाच अल्पवयीन मुलांच्या बेपत्ता होण्याच्या घटना शांतीनगर परिसरातून समोर आल्या आहेत. यामध्ये तीन मुलींचा समावेश आहे.
शांतीनगर रोड, पिराणीपाडा या परिसरात राहणाऱ्या तबसुम नईम अन्सारी यांचा १५ वर्षे वयाचा मुलगा सादिक अन्सारी हा १२ जून रोजी सायंकाळी साडेचार वाजता घरातून कोठेतरी निघून गेला. अज्ञात व्यक्ती त्याला फूस लावून पळवून घेऊन नेले, अशी तक्रार शनिवारी सादिकच्या आईने दिल्याने शांतीनगर पोलिस ठाण्यात अपहरणाचा गुन्हा दाखल झाला आहे.
दुसऱ्या घटनेत गैबीनगर येथील शफीक अहमद मोहम्मद सलीम अन्सारी यांची नबीहा फातमा शफीक अन्सारी (वय ११) ही मुलगी व तिची मैत्रीण अल्फीया जमील अन्सारी (वय १६, रा. गैबीनगर) या दोन्ही अल्पवयीन मुली रात्री आठ वाजता घराबाहेर गेल्या असता, त्यांच्या अज्ञानाचा कोणीतरी गैरफायदा घेऊन त्या दोघींचे अपहरण केल्याची तक्रार शफीक अहमद अन्सारी यांनी दिलेल्या तक्रारीवरून शांतीनगर पोलिसांनी अज्ञाताविरोधात अपहरणाचा गुन्हा दाखल केला आहे.
नागाव परिसरातील अमन आजम खान यांचा १७ वर्षांचा सावत्र भाऊ मोहम्मद फैज ऊर्फ आयान मजहर अली खान हा सोमवारी (ता. १६) सकाळी सात वाजता कॉलेजला गेला तो परत आलाच नाही. त्याचा शोध घेऊनही न सापडल्याने त्याबाबत शांतीनगर पोलिस ठाण्यात तक्रार नोंदवण्यात आली. तर गैबीनगर परिसरात इंतिखाब आलम मुज्जफर अली अन्सारी यांची १६ वर्षांची मुलगी झोया ही सोमवारी सात वाजता कॉलेजला जाते, असे सांगून गेली ती दिवसभरात घरी परतली नाही. तिला अज्ञात व्यक्तीने फूस लावून पळवल्याची तक्रार दिल्याने पोलिसांनी अपहरणाचा गुन्हा दाखल केला आहे.