भेटवस्तू देत शैक्षणिक वर्षाला सुरुवात

नेरूळ, ता. १७ (बातमीदार) : पुणे विद्यार्थिगृहाच्या नेरूळ येथील विद्याभवन शिक्षण संकुलात नवीन शैक्षणिक वर्षाची सुरुवात उत्साहात करण्यात आली. मुख्याध्यापक आणि शिक्षकांनी विद्यार्थ्यांचे औक्षण करून विद्यार्थ्यांना शालोपयोगी साहित्य, पुस्तके आणि चॉकलेट्सचे वाटप करण्यात आले. उल्का झगडे या विद्यार्थिनीने उत्स्फूर्तपणे शिक्षणाविषयी तिचे विचार मांडले. मुख्याध्यापिका सुवर्णा मिसाळ, श्रीजा नायर, मनीषा मुळीक, मुख्याध्यापक गोरख कदम, समन्वयक पांडुरंग मुळीक, आदर्श शिक्षक अविनाश कुलकर्णी, शिक्षिका पौर्णिमा खर्जे यांनी विद्यार्थ्यांना नव्या शैक्षणिक वर्षासाठी शुभेच्छा दिल्या. ध्येय, आरोग्य, संस्कार, अभ्यास, शालेय शिस्त, क्रीडा आणि इतर उपक्रमांची माहिती या वेळी देण्यात आली. नेरूळ येथील विद्याभवन शाखेचे हे रौप्यमहोत्सवी शैक्षणिक वर्ष असल्यामुळे आजच्या पहिल्या दिवसाला विशेष महत्त्व देण्यात आले. विद्यार्थ्यांना पुढील वर्षभरातील उपक्रमांची माहिती देण्यात आली. या कार्यक्रमाला सर्व शिक्षक आणि विद्यार्थी उपस्थित होते.