शंभुदुर्ग संघटनेची महावितरण कार्यालयाला धडक

शंभुदुर्ग संघटनेची महावितरण कार्यालयाला धडक
कल्याण (वार्ताहर) : शंभुदुर्ग संघटना ठाणे जिल्हाध्यक्ष सागर मोरे व संघटना पदाधिकारी सदस्य तसेच खडवली परिसर सांस्कृतिक मंडळाच्या वतीने महावितरण कार्यालय खडवली येथे धडक मोर्चा काढण्यात आला. खडवली परिसरात सातत्याने होणाऱ्या वीज कपातीने परिसरातील नागरिक त्रस्त आहेत. त्याचा परिणाम लहान मुले व शाळकरी मुलांवर होत आहे. त्यामुळे मोर्चाच्या माध्यमातून खडवली येथील सर्व समस्या महावितरण मुख्य अभियंता व सहाय्यकांच्या निदर्शनात आणून दिल्या. या मोर्चाला अनुसरून केलेल्या सर्व मागण्या महावितरण अधिकाऱ्यांनी मान्य केल्या असून सर्व समस्या तत्काळ सोडविण्याचे आश्वासन देण्यात आले. खडवली परिसरात समस्या सोडविण्यासाठी विशिष्ट प्रकारचे एक पथक परिसरात नेमण्यात येणार आहे. इतर दुरुस्तीचे काम करण्यासाठी आठवड्यातील शुक्रवार हा एक दिवस बंद घेण्यात येईल, अशी ग्वाही मोर्चेकऱ्यांना देण्यात आली.
.....................
फोर्टिस हॉस्पिटलमध्ये फादर्स डे साजरा
कल्‍याण (वार्ताहर) : आंतरराष्ट्रीय फादर्स डेनिमित्त फोर्टिस हॉस्पिटलने ४० वर्षांवरील पुरुषांसाठी प्रोस्टेट तपासणी शिबिरांचे आयोजन केले होते. १४ आणि १५ जून रोजी कन्सल्टंट युरोलॉजिस्ट, युरो-ऑन्कोलॉजिस्ट आणि किडनी ट्रान्सप्लांट सर्जन डॉ. प्रदीप व्यवहारे यांच्या नेतृत्वाखाली दोन ठिकाणी दोनदिवसीय शिबिराचे आयोजन केले होते. ज्‍यामध्‍ये कल्याण, डोंबिवली आणि ठाकुर्ली येथील १५४ व्‍यक्‍तींनी सहभाग घेतला. या शिबिरात सहभागी झालेल्‍या पुरुषांची प्रोस्टेट तपासणी केली, तसेच प्रतिबंधात्मक उपायांबद्दल मार्गदर्शन केले. या शिबिरांत सर्व सहभागींशी वैयक्तिक चर्चा करून त्यांच्या प्रश्‍नांचे निराकरण केले. डॉ. प्रदीप व्यवहारे यांनी सुरुवातीच्या लक्षणांवर आणि मूत्रविकाराच्या आजारांचे वेळेवर व्यवस्थापन यावर माहितीपूर्ण मार्गदर्शन केले. ज्यामध्ये प्रोस्टेट आरोग्य, यूरिनरी ट्रॅक्‍ट इन्‍फेक्‍शन्‍स (यूटीआय) (मूत्रमार्गाचे संक्रमण), किडनी स्टोन, मूत्रमार्गातील अडचणी, वाढलेली प्रोस्टेट आदी प्रमुख विषयांवर चर्चा केली. उपस्थितांनी या उपक्रमाचे कौतुक केले.