देशातील पहिला सृजनशील, सांस्कृतिक रेडिओ महोत्सव मुंबईत

देशातील पहिला सृजनशील, सांस्कृतिक रेडिओ महोत्सव मुंबईत
२१ जूनला आशा रेडिओ पुरस्काराचे वितरण
मुंबई, ता. १८ : जागतिक संगीतदिनाचे औचित्य साधून शनिवारी (ता. २१) सांस्कृतिक कार्य विभागामार्फत यावर्षी देशातील पहिला सृजनशील आणि सांस्कृतिक महाराष्ट्र रेडिओ महोत्सव आणि महाराष्ट्र आशा रेडिओ गौरव पुरस्कार २०२५चे आयोजन करण्यात आले आहे. याबाबतची घोषणा सांस्कृतिक कार्यमंत्री ॲड. आशीष शेलार यांनी पत्रकार परिषदेत केली.
यशवंतराव चव्हाण प्रतिष्ठान सभागृह येथे शनिवारी सायंकाळी ४.३० वाजता सोहळा आयोजित करण्यात आला असून, मुख्यमंत्री देवेंद्र फडणवीस यांच्या उपस्थितीत १२ रेडिओ पुरस्कारांचे वितरणही करण्यात येणार आहे.
ॲड. आशीष शेलार यांनी सांगितले, की मराठी भाषा आणि कलाकारांसाठी नवे व्यासपीठ या माध्‍यमातून निर्माण होईल. रेडिओ क्षेत्राचा गौरव करणारा हा ऐतिहासिक उपक्रम आहे. राज्याची सांस्कृतिक, ऐतिहासिक परंपरा जपण्याचे काम रेडिओमार्फत झाले आहे. विविध क्षेत्रांतील तज्ज्ञांच्या मुलाखती आजही रेडिओमार्फत जतन करण्यात आल्या आहेत. देशाच्या स्वातंत्र्यापासून ते महाराष्ट्राच्या निर्मितीपर्यंत सर्व ऐतिहासिक घटनांचा रेडिओ साक्षीदार आहे.
मराठी निवेदक, मराठी अभिनेते, संगीतकार, गीतकार, लेखक, तंत्रज्‍ज्ञ, संपादक यांना एक व्यासपीठ मिळावे. मनोरंजनासोबत प्रबोधन, राजकारण, सामाजिक जाणीव यासाठी भरीव योगदान रेडिओने दिले आहे. त्यांना या माध्यमातून योग्य सन्मान देण्यासाठीचा हा प्रयत्न असल्याचे त्यांनी या वेळी सांगितले.

आकाशवाणीसह खासगी चॅनेलची महत्त्वपूर्ण भूमिका
महाराष्ट्रात जशी आकाशवाणीने भूमिका निभावली आहे तसेच खासगीकरण आणि पाश्चात्यीकरणाच्या काळात खासगी एफएम चॅनेल आणि कम्युनिटी रेडिओनेही भूमिका अधोरेखित केली आहे. मराठी संगीत, गाणी, शास्त्रीय संगीत जपणारे, उद्यमशील आणि सृजनशील रेडिओ चॅनेलला प्रोत्साहन मिळावे, यासाठी हे पुरस्कार प्रदान करण्यात येत आहेत.

आशा भोसले यांच्या नावाने पुरस्‍कार
प्रदान करण्यात येणाऱ्या १२ रेडिओ पुरस्कारांत आशा रेडिओ गौरव पुरस्कार हा संगीत क्षेत्रातील अग्रगण्य नाव असणाऱ्या ‘महाराष्ट्रभूषण आशा भोसले’ यांच्या नावाने देण्यात येणार आहे. आशा भोसले यांचे संगीत क्षेत्रातील एकूण योगदान लक्षात घेता, हे नाव देण्याचे सरकारने निश्चित केल्याचे ॲड. आशीष शेलार यांनी सांगितले.