लघु पाटबंधारेची नऊ धरणे तुडूंब

रोहा, ता. १८ (बातमीदार) ः मुसळधार पावसामुळे नदी, नाले, तलावांच्या पाणीपातळीत वाढ झाली आहे. कोलाड येथील पाटबंधारे विभागाच्या अखत्यारित असलेल्या नऊ धरणांमध्ये १०० टक्के जलसाठा आहे. लघुपाटबंधारेची सात धरणे ७५ टक्‍के भरली आहेत. तर १२ धरणांमध्ये ५० टक्‍के जलसाठा उपलब्ध असल्याची माहिती विभागाकडून देण्यात आली आहे.
मे महिन्यात अवेळी दाखल झालेल्‍या पावसाने रायगड जिल्ह्यात थैमान घातले होते. त्यानंतर लगेचच जूनमध्ये मोसमी पाऊस सक्रिय झाला. महिनाभर जिल्ह्यातील बहुतेक भागाला मुसळधार पावसाने झोडपून काढल्यानंतर तालुक्यातील बहुतांश धरणांत मोठ्या प्रमाणात जलसाठा जमा झाल्याचे दिसून येत आहे. काही ठिकाणी धरण ओसंडून वाहत आहेत.
लघु पाटबंधारे विभागाकडून जिल्ह्यात विविध ठिकाणी जलसाठा जमा करण्यासाठी छोटी-मोठी धरणे बांधण्यात आली आहेत. हे पाणी वर्षभर शहरी व ग्रामीण भागातील असंख्य गावांना पुरवठा केले जाते. एप्रिल-मेमध्ये उन्हाळ्यात धरणातील पाणीसाठा कमी होत असल्यामुळे सर्वत्र पाणीटंचाई निर्माण होते; मात्र या वर्षी मे महिन्यात असलेल्‍या पावसाने बहुतांश धरणामध्ये निम्‍म्‍याहून अधिक जलसाठा झाला.
रायगड जिल्ह्यातील सुतारवाडी (रोहा), उन्हेरे व कोंडगाव (सुधागड), पाभरे व संदेरी (म्हसळा), खिंडवाडी (महाड), भिलवले (खालापूर) व कोथुर्डे (महाड) या नऊ धरणांत सध्या १०० टक्के जलसाठा उपलब्ध असल्‍याची माहिती कोलाड पाटबंधारे विभागाकडून देण्यात आली आहे. तळा तालुक्यातील वावा व मुरूड तालुक्यातील फणसाड धरणात ७५ ते ९९ टक्‍के साठा उपलब्ध आहे.

श्रीवर्धन तालुक्यातील कार्ले व कुडकी, खालापूर तालुक्यातील कलोते-मोकाशी व डोणवत तर कर्जत तालुक्यातील अवसरे धरणात ५० ते ७५ टक्‍के जलसाठा उपलब्ध आहे. महिनाभर मुसळधार पाऊस पडूनही आंबेघर (पेण), श्रीबाग (अलिबाग), घोटवडे व ढोकशेत (सुधागड), रानिवली (श्रीवर्धन), वरंध (महाड), साळोख (कर्जत), पुनाडे (उरण) तर पनवेल तालुक्यातील मोरबे, बामणोली, उसरण या धरणात ५० टक्‍क्‍यांपेक्षा कमी पाणीसाठा असल्याची नोंद करण्यात आली आहे.

रोहे ः सुतारवाडी धरणातील जलसाठा वाढला आहे.