वीज समस्याबाबत शिवसेनेने घेतली अधिकाऱ्यांची भेट

विरार, ता. १८ (बातमीदार) : पूर्वेतील विजेच्या समस्यांसंदर्भात शिवसेना तालुकाप्रमुख सुदेश चौधरी यांच्या नेतृत्वाखाली शिष्टमंडळाने महावितरणचे अतिरिक्त कार्यकारी अभियंता ईश्वर भारती यांची बुधवारी (ता. १८) भेट घेतली. या भेटीदरम्यान विविध समस्या त्यांच्यापुढे मांडल्या. यावेळी शिष्टमंडळाने वारंवार खंडित होणारा वीजपुरवठा, वीजपुरवठ्याबाबत स्थानिकांना कोणतीही माहिती न पुरविणे, वीज वितरण व्यवस्थेतील त्रुटी, धोकादायक ट्रान्सफॉर्मना कम्पा‍उंड व डीपीची दुरुस्ती करणे आदी मागण्या अतिरिक्त कार्यकारी अभियंत्याकडे केल्या. शिवसेना शहरप्रमुख उमेश गोवेकर यांच्यासह उपशहरप्रमुख चंद्रशेखर साटम, उपशहर संघटक मंगला मोंडे, विभाग संघटक खुशी सोनी, शाखाप्रमुख मोहन मोंडे, उपशाखा प्रमुख सुभाष नरवणकर, संजय भुवड, स्थानिक रहिवासी सुनंदा जाधव, सारिका गोताड, सेजल नेमळेकर आणि चिराक वर्तक उपस्थित होते.